• |
  • 極速報價
  • |
  • 會員
  • 產品服務 / 串流版
  • 設定

18/03/2021

建制派為新政制各懷鬼胎

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

 

  中央官員喺周三(17日)完成一連三日聽取香港各界人士就人大修改本港選舉制度意見嘅座談會。三日66場座談會,見逾千人之後,港澳辦副主任張曉明總結時就話,新嘅選舉委員會獲賦權選出「較大比例」立法會議員,「意思是比另外兩種方式(直選同功能組別),產生議員的數量要多」,似乎已經係一槌定音,3:3:3幾乎係幻想,問題係2:3:4定係2:2:5。

 

  Tina問過幾位分別出席唔同場次座談會嘅建制派人士,佢地不約而同都話,出席嘅人其實都就新框架各紓己見,「京官」都係好開放咁聽,間唔中又會問幾句,例如點解支持呢個方案,又點解唔支持另一個方案。總括來講,現時已經喺立法會佔有一定議席嘅黨派,特別係有參與多年直選經驗嘅,都唔希望阿爺縮減直選議席,以免影響第二梯隊排住上陣;而其他非黨派嘅親中組織,大家諗都諗得到,佢地係支持選舉委員會界別最終係佔大多數,無乜直選經驗嘅佢地安排代表入立法會嘅機會就會大增。

 

  有現任直選議員同Tina講,自從阿爺講明選舉委員會會佔「大比例」之後,黨內對於3:3:3已經唔寄予厚望,縮到去得返20席的話,雖然估計「真泛民」會出選或者拎到資格選嘅機會唔大,但係20席都係由建制派爭的話,亦估計競爭都唔會細,「依家嘅情況似係大洗牌,以前有反對派,建制派會統一戰線搵代表出選;依家無反對派,大家就各懷鬼胎,最終由四五個建制參選人爭兩席都唔出奇」。

 

  至於功能組別同埋新加嘅選委會組別,佢估計選委會組別將會「亂到七彩」,傳統大政黨估計唔會有優勢,極可能會由一眾親中大會根據勢力而「分餅仔」。

 

  佢進一步分析:「以往傳統建制政黨都會搵呢啲親中大會幫手拉票,某程度上係幫手,但實際上都係西環落柯打要撐邊個就撐邊個,有時仲要受呢班參選議員嘅氣。依家各有各做,試問大會又點會再聽政黨支歌仔?幾個大會合埋一齊,喺選委會入面嘅勢力隨時已經分咗一半席位,相信嚟緊新一屆立法會90席入面會有唔少新勢力組成,隨時七國咁亂。不過最頭痕嘅我諗會係特區政府……」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

我要回應

你可能感興趣

放大顯示

精選文章

  • 生活
  • DIVA
  • 健康好人生