• |
  • 極速報價
  • |
  • 會員
  • 產品服務 / 串流版
  • 設定

14/04/2021

新選舉制度,建制直選大將謀轉跑道

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  「千呼萬喚」特首林鄭月娥噚日(13日)終於公布「完善選舉制度」最新嘅安排,包括全新直選20席點樣劃分十區,亦都一併公布埋。

 

  正如Tina之前文章都有講過,今次直選嘅組成將會有翻天覆地嘅改變。十區20席雙議席單票制,阿爺嘅盤算係,最壞嘅情況係建制同泛民各有十席,呢個係最最最壞情況;如果泛民唔選或唔係十區都選的話,建制直選將會搶得更多席位。

 

(資料圖片)

 

  按照上一屆直選議席分布的話,十席建制一定唔夠分,肯定有一批要「犧牲」。有報章今日(14日)更加透露,港島嘅葉劉淑儀、九西梁美芬同埋九東嘅謝偉俊,都因為直選議席唔夠分,可能會被西環安排喺選舉委員會界別出選,留返啲席位畀其他後生嘅去衝鋒陷陣。

 

  不過據Tina從多方渠道得知,其實早喺新方案公布之前,唔少建制派嘅直選大哥大姐,早已經向西環表明心跡,謀求轉跑道,由直選轉過去選委會出選。「選舉從來都唔係容易嘅事,能夠出選選委會議席,基本上就係督定個位等投票結果公布,比起直選慳水慳力,面對嘅選民人數大減,又唔使做咁多地區工作,肯定係吸引好多。最緊要係,今次改制明顯就係要壓低直選嘅話語權,咁畀得阿爺或者西環欽點喺選委會出選,身份地位都自然被抬高唔少,建制派嘅大哥大姐又點會唔流口水?」一名建制派元老有咁嘅評述。

 

  不過有更重要一點,就係直選嘅十區,睇依家個勢,為防泛民全線撤退無人玩,建制都極可能會協調出兩條隊,以免出現兩個位得一個候選人嘅尷尬情況出現。如果建制真係出兩條隊,例如民建聯一條、新民黨又一條,再加多一兩位不知名人士,咁政黨都好穩陣,但最後真係有泛民入閘,甚或者支持泛民嘅市民「玩嘢」谷晒啲票去不知名人士,咁建制就極可能會二輸一,「試問啲大哥大姐點輸得?坦白啲講,都係有人怕輸先早早舉手話轉跑道姐。」不過呢位元老都補充,嚟緊立法會選舉變動太大,今時今日講分餅仔,仍然係言之尚早。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

我要回應

你可能感興趣

放大顯示

精選文章

  • 生活
  • DIVA
  • 健康好人生