• |
  • 極速報價
  • |
  • 會員
  • 產品服務 / 串流版
  • 設定

07/01/2022

只許高官派對,不許百姓晚飯?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  千算萬算都算唔到,完善選舉制度之後官政界第一大花生,甚至話係官商名流政圈嘅一次地震,竟然係源於一個派對。

 

  噚日喺政圈最早率先傳開嘅,係民建聯立法會議員陳仲尼嘅助理,同一位初步確診者有接觸,所以陳好早就主動申報並且同媒體講,自己會去做檢測。立法會第一次會都未開,隨時爆出「立法會群組」,當然夠晒可觀性,陳同埋初步確診者有接觸呢個消息廣傳之後,立法會議員邱達根同陸瀚民亦都牽扯入其中。

 

  由於愈來愈多人涉及事件,終於令到呢場「Omicron派對」曝光。原來1月3日係人大代表洪為民嘅生日派對,賓客過百人,當然亦係衣香鬢影,官商雲集,出席過嘅政府官員據特首林鄭月娥主動向傳媒透露,有十人之多,包括要即時送去檢疫隔離嘅民政事務局局長徐英偉,連「一哥」蕭澤頤亦都在場,花生指數直線飆升。

 

  官場嘅花生朋友就話,洪為民唔係官唔係議員,但佢喺政界都算係一號人物,但比起其他嘅達官貴人仍然係仲有一段距離,「換咗係第二個更加有影響力嘅搞派對,我肯定高官到嘅數目更多、級別更高、留得更長!今次真係不幸中之大幸……」事件的而且確令到政府以至整個政治體系形象受損,呢頭準備今晚禁食肆夜晚堂食,嗰頭官商名流爆出派對播毒,真係「只許高官派對,不許百姓晚飯」。

 

(晴報圖片)

 

  至於點收科,花生朋友形容,林鄭想低調處理呢個爛攤子都難,因為今次派對換轉係喺國內發生,所有參加派對嘅政府官員肯定已經烏紗不保;林鄭昨晚主動見記者,用其他官員到一到場恭賀下就走做對比,對徐英偉留足全場表示非常失望,並透露會對個別官員採取行動,已經係保存大局之中見最少血嘅處理方法。「臨近特首選戰,手起刀落要令局長落馬,我相信已經放喺林鄭嘅口袋名單之中,所以徐英偉都聞到陣除,要喺個人facebook到鄭重道歉,話以後不能再犯,仲想封後門話以後會努力做好工作;但問題就係,抗疫係國家嘅主旋律,炒徐一個人保住其他赴宴官員同林鄭自己嘅政治前途,條數絕對係計得過。」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ