• |
  • 極速報價
  • |
  • 會員
  • 產品服務 / 串流版
  • 設定

15/07/2022

新官上任三把火,亂定目標終惹禍

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  「新官上任三把火」係萬變不離其宗嘅大道理,新政府上場,首長係新嘅、官員又係新嘅,好自然想快快手有成績畀市民睇、同阿爺交代。交到功課就當然係博到掌聲,之但係交唔到仲搞出大頭佛,其實絕非少數。

 

  新一屆特區政府上任兩星期未到,最多見報嘅局長非醫務衛生局長盧寵茂莫熟。一上場無耐就果斷取消航班熔斷機制,唔少商家佬都大讚佢做到嘢,仲話研究縮短酒店檢疫期,令到航空股都炒咗幾轉。

 

晴報圖片)

 

  周初盧局長就乘勝追擊,自己主動同傳媒講,計劃考慮參照內地嘅方式,推行「安心出行」實名制、「紅黃碼」等,限制部分人士喺香港嘅行動範圍,結果就惹來唔少爭議,甚至搞到李家超都要出手「調整」盧局長個講法,亦要同樣係新上任嘅創新科技及工業局長孫東解畫,搞到熟悉政府運作嘅高級公務員搖晒頭。

 

  Tina同啲高級公務員傾開,佢地就話,每逢有新官上任,佢地一向都好驚班官「講大咗」。高級公務員指出,政策由醞釀去到落實都經過唔短嘅時間去做可行性研究,絕對唔係掛住「結果為目標」做口號,一有目標就講出來,「你有目標就講出來可以好大件事,你話要將香港足球推向世界第一,目標夠清晰,但你點樣做?點樣培訓人才?點樣有更多球場做配套?好多執行上嘅層面,唔係講咗就做到,一定要有基礎,佢咁快就將細節講出來,根本就唔會係政府一貫嘅做法,無論政府幾有效率都好,都唔會咁快解決到執行細節。」

 

  有政圈中人都話,過往有咩訴求都係先同政府官員私底下傾咗,到有返咁上下眉目先會公諸於世,「特別係呢啲影響全部市民嘅政策,真係唔係山草藥,希望盧局長又好、其他新任局長都好,要以此為鑑,唔好再亂咁講惹起恐慌。」

 

  而今次事件都唔係無好處,就係畀人感覺到新政府真係想「做到啲嘢」。不過盧局長初當官員,真係唔好心口掛住個「勇」字就衝出來講你諗緊嘅嘢,呢個做法只有特朗普先會做,而做完嘅後果,你唔係特朗普都承擔唔到呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ