• |
  • 極速報價
  • |
  • 會員
  • 產品服務 / 串流版
  • 設定

08/12/2023

博物館大兜亂,議員怎打算?

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  特首李家超喺《施政報告》之中提到要興建一個以國家發展成就為主題嘅博物館,作為國家嘅對外窗口,香港要做好呢個工作可以話係責無旁貸,起多個館使幾個億,雖然話庫房水位愈來愈低,但點都係足以應付嘅。不過就萬萬無想過,政府諗嘅唔單止係起多一個館咁簡單,而係會將現有嘅幾個博物館進行大兜亂,惹起輿論高度關注。

 

  政府初步嘅考慮,係將國家發展成就館設喺依家尖沙咀科學館嘅位置,咁一向極受大小朋友歡迎嘅科學館,就會搬到去沙田文化博物館現址。咁文化博物館又會搬去邊度?基本上可以話係功成身退,入面嘅展覽極有可能會融入去其他展覽館。

 

  點解政府要大費周章?直接起一個全新嘅博物館唔係更簡單直接?據聞政府初步希望國家發展成就館喺市區,咁就更能方便大眾,而縱觀芸芸現成博物館,都無乜幾多個有科學館咁四通八達,再加上科學館設施已經唔多科學,反正都係要重新執過晒,咁轉為國家發展成就館就似乎順理成章。

 

政府初步計劃將國家發展成就館設喺依家科學館嘅位置。(網上圖片)

 

  經Tina打聽之下,相信政府都係一招「以退為進」。政府擔心如果一開始就提出覓地建館,咁好難再喺市區靚地插到針,到時要去到偏遠地區的話,話唔埋又會畀愛國愛港嘅議員炮轟;依家先揀咗最優先希望設置嘅地點提出方案,等社會作出詳細討論,再由一眾議員根據民情判斷最終定案,咁政府就少咗被痛罵嘅機會。

 

  暫時睇到嘅民情,似乎對於政府方案都係反對多過贊成。首先,科學館一直都深入民心,更加係唔少家長幫小朋友「放電」嘅好去處,假期成日爆場,就連下面條街都係叫「科學館道」;其次,政府計劃殺咗文化博物館,對文化界來講亦都係一場災難,少咗一個恆常展館去做展覽。

 

  Tina同幾個民政Panel嘅議員八過吓,佢哋都話依家難以決定支唔支持政府方案;最有「智慧」嘅一個議員形容,要否決政府方案其實都好容易,事關庫房有排缺水,揀一個最慳錢嘅方案自然就係最符合公眾利益,咁理應揀個變動最少嘅方案就最妥當,擺到明就係會否決政府嘅初步建議。

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全城注視!銀行定存比較神器,助你搵到最佳息率!► 立即了解

我要回應

你可能感興趣

放大顯示
風水蔣知識

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ