• |
  • 極速報價
  • |
  • etnet專輯
    etnet專輯
  • 會員
  • 產品服務 / 串流版
  • 設定

17/05/2024

公僕加人工,再考政府智慧

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  負責為全港超過19萬公務員制定薪酬調整幅度指標嘅「薪酬趨勢調查委員會」,剛剛喺噚日(16日)公布最新嘅2024年薪酬趨勢調查報告,各級公務員加薪淨指標,分別係高級公務員4.01%、中級公務員4.32%同埋低級公務員5.47%,遠遠超過之前市場預期嘅3%至4%。

 

  消息一公布,市面「嘩嘩聲」四起,事關成4%至5%人工加幅,對私營市場九成打工仔近幾年嚟講,都係遙不可及。有熟知政府運作嘅政界中人就話,每年嘅薪酬趨勢調查委員會報告,都令到政府高層頭都大埋,佢形容:「私營機構加幾多人工,梗係睇吓公司去年盤數同埋預測未來2、3年經營狀況去決定,簡單好多;但政府加幾多人工畀公務員,要考慮嘅因素唔單止係自己個荷包,仲要睇埋對私營市場嘅影響,絕對係政治學上一門高深學問。」

 

  今年公布呢個遠超市場預期嘅加幅,絕對係令到政府處於幾尷尬嘅局面。如果跟足建議去加人工,好處當然係公務員士氣獲得提振,有助現屆政府繼續積極推行各項政策,等下面嘅公務員「攰死」之餘,起碼荷包得以充實。不過現時市場經營環境並唔係一面向好,以往一直係「天之驕子」嘅金融機構更加出現裁員情況,中小企更加喺北上消費熱潮之下「得個做字」,街上、商場吉舖處處,如果政府帶頭加足5%薪酬,對私營市場絕對係沉重打擊。

 

薪酬趨勢調查委員會建議嘅公僕加薪幅度,遠超市場預期。(Shutterstock)

 

  喺面對千億財赤、儲備跌到得番7000億元、政府甚至要加大發債去支持基建項目嘅時候,加薪5%,講緊每年開支要增加超過60億元,政界中人就話:「呢頭你話政府唔夠錢要研究加呢樣收費、減嗰樣使費,到頭來加人工就要每年使多60億至70億元,試問又點樣同市民交代?」

 

  而加唔足嘅話,對政府運作亦有唔少影響。有公務員朋友形容,呢幾年行政主導勢頭之下,個個局都要交足功課,上面有任何諗頭,做細嘅就要出頭,唔少部門嘅中高層都做得辛苦過出名工時長嘅四大核數師行,夜晚10點後收工都係等閒事,「人工加得唔夠好,可能就會令到人手流失加劇,特別係30幾歲中層嗰班,佢哋有政府工作經驗,行出去好多私營機構都爭住要,政府人工加唔夠,呢班中堅走咗就好難再填補」。

 

  有立法會議員就私底下透露,早排都已經有評論認為公務員要減人工去同政府庫房共度時艱,不過佢自己就覺得,呢種講法無非都係社會嘅一種怨氣,「要解呢口怨氣好簡單,只要最高嗰班官員唔加人工之餘仲自願凍薪,甚至減人工,輿論就自然會覺得高層有承擔,呢啖氣就自然吞得落,下面加得足又點話呢!」

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

《說說心理話》與你分享遭遇欺凌該如何應對 教你兩個方法輕易彈走負面情緒► 即睇

我要回應

你可能感興趣

放大顯示
師傅靈靈法
精選文章
  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ