• |
  • 極速報價
  • |
  • 會員
  • 產品服務 / 串流版
  • 設定

22/10/2018

九龍西補選抽冧把 邊個係Lucky號碼?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  經過一輪DQ之後,終於都到咗九龍西補選候選人簡介會喇!上次補選九龍西就得3個人參加,而新界東就「6人大混戰」。唔知係唔係因為今次得九龍西呢區補選,今次都差啲嚟多次「大混戰」吖!今日選管會就同各候選人抽完「冧把」,得出1號係伍廸希、2號係曾麗文、3號係李卓人(阿人)、4號係馮檢基(基哥)、5號係陳凱欣(阿欣)。大家好快就可以喺九龍西見到號碼旗仔周圍飛喇!

 

 

Jenny估阿欣好快喺街頭叫九西街坊「Give me five」。

 

基哥成為4號仔 好似唔多「老黎」

 

  不過Jenny都話齋,係「差啲」啫!因為選舉主任仲有把「DQ寶劍」呀嘛!所以而家結果出嚟咪係5人入到閘抽Number,其餘兩位有冇得「下回請早」都未知!上次鄭泳舜手執2號成功跑出,今次2號係「大冷門」曾麗文;反而大熱阿欣就係5號,Jenny已經估到佢競選嗰陣會叫大家「Give me five」;而被視為主要對手嘅阿人係3號,係咁整OK手勢都易記。至於基哥成為4號仔,Jenny就覺得「死、死」聲,好似唔多「老黎」喇……

 

「4」、「死」個音近似,基哥會唔會唔like呢?

 

風一般的選舉主任

 

  呢兩位被DQ人士就係劉小麗同埋陳國強喇!劉小麗點解被DQ,之前已經被廣泛報道喇!反而陳國強就因為一個「硬傷」--冇交選舉按金而甩轆!Jenny就諗起,上次立法會補選都有位參選人,因為交唔足提名而「被DQ」。陳國強玩過咁多次,做乜都咁唔小心呀!

 

  之但係就算阿強交齊文件,選舉主任畀唔畀佢入又係一個問題,事關佢之前就曾經因為支持港獨而被DQ過兩次。雖然而家已經好少再提港獨,但係選舉主任肯唔肯「信納」都係一個問題!都係嗰句,「得選舉主任得天下」,全世界信定唔信都唔重要,最緊要主任大人信!抽完籤大家都想問下選舉主任幾句,點知佢「嗖」一聲就唔見咗!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生