相信好多人都同Jenny一樣，覺得去親社企實習嘅都會係社會科學系嘅同學仔，商科生可以話係同社企沾唔上邊。不過Jenny就知道社聯今日下午有個活動，就係搵咗班商科同學仔去社企實習！就咁聽都幾新奇，Jenny梗係要去睇下呢個組合會有咩火花先！個活動仲設立咗個「超凡卓越大獎」，表揚做到好嘅同學仔，今屆就有4位同學仔得獎，清一色都係女仔，幾時都話女仔有愛心又有腦最Charm㗎啦！

左起公開大學李曉娟同學、中文大學劉翊蕎同學、香港大學查樂瑤同學，同埋公開大學許思恩同學。

老友記周身刀不得了

　　呢4位同學分別就去咗「銀杏館」同埋福幼基金會做實習，聽個名都知道前者係專門針對老人家；後者就係針對小朋友喇！去「銀杏館」實習嘅兩位同學仔，香港大學嘅查樂瑤，同埋公開大學嘅許思恩，就同Jenny驚嘆好多老人家都好犀利！

　　查同學話，佢哋接觸到喺「銀杏館」工作嘅長者時，發現佢哋好多都好見多識廣，仲有位伯伯同佢用西班牙文傾偈添！而負責設計餐廳海報嘅許同學就話，以前以為長者缺乏IT方面嘅知識，同佢哋共事完先發現唔係㗎！

社企做實習 商科同學仔開眼界

　　而點解佢哋會揀呢間社企做實習呢？許同學就透露，原來佢屋企兩位老人家－－嫲嫲同埋婆婆都係不良於行，所以佢諗起實習時遇到嘅長者同事都好感慨，話見到啲公公婆婆咁活潑，作為年輕人好應該要支持佢地！講講下仲喊咗出嚟，Jenny都聽到眼濕濕呀！

　　至於另外兩位得獎同學，來自中文大學劉翊蕎同埋公開大學李曉娟，就去咗福幼基金會做實習。佢哋不約而同都話，以前以為喺大型啲嘅NGO會多啲資助，做嘅嘢可以多啲，但經過今次之後，佢哋都覺得原來細NGO可以更加有針對性、更有心，亦都好開心自己識嘅知識可以用喺社企入邊，以後都有興趣向呢方面發展添！睇嚟呢個活動唔單只可以畀商科同學仔有多啲機會接觸社企，又可以令佢哋嘅知識補足社企比較缺乏嘅商業技巧，Jenny覺得好值得鼓勵！