上兩個星期因為唔少人大政協要開兩會，連帶立法會都要讓路。點知兩個星期返來，唔少議員都仲有Holiday Mood，今日竟然有條質詢冇人追問，仲要係阿爺時時刻刻強調嘅「一帶一路」添呀！無他嘅，而家最Hit嘅Topic係「大灣區」嘛！

 商經局副局陳百里一臉懵然。

　　話說，今日自由黨黨魁鍾國斌提出咗條口頭質詢，係問商經局「一帶一路」辦公室嘅工作。平時提出質詢嘅議員提問完之後，就會輪到其他想發言嘅議員發問。講得「平時」即係今日有唔同啦！

　　就喺副局陳百里答完鍾國斌之後，鍾國斌突然好晦氣咁同主席講：「主席，我就唔知道我今日條問題係好無聊呀，定係冇用？」咩事呢？望望先……原來成個議事廳空了了，除咗鍾國斌之外，就淨係得社福界邵家臻坐喺度。成個畫面好空虛啊！

　　鍾國斌嬲嬲豬到無視咗邵家臻，繼續講落去：「你睇下，議會係冇人喺到，主席，你見過立法會一個質詢時間係議員都冇，或者冇跟進問題？」仲貌似愈講愈火，「一帶一路係國家咁重要嘅政策，竟然喺香港議會係冇人跟進或者質詢問題，我冇嘢跟進！」唉！連自己啲黨友都唔幫手撐場，唔怪得佢嬲嬲豬啦！連追問都費事呀！Jenny望住佢做獨腳戲，Feel so sad！

　　可能連大主席梁君彥都未見過呢個情況，見鍾國斌一輪咀講完就一嘢坐返低，都未Load得切鍾國斌噏緊乜，望望左、望望右、再望返左……現場Dead Air咗整整6秒，仲好似未訓醒咁，竟然叫副局回應添！阿副局明顯估唔到主席突然拋個波畀佢，眼都突埋咁問：「個跟進問題係……？」

　　鍾國斌都冇咁好氣，重複多次「無跟進問題！」就算數。但原來故事仲未完，到下晝，鍾國斌條氣似乎仲未順返，趁大家都響會議廳傾緊大灣區時，話大家唔理「一帶一路」，而場外嘅Jenny同行家們就當然笑到反艇喇！