• |
  • 極速報價
  • |
  • 會員
  • 產品服務 / 串流版
  • 設定

17/09/2019

光天化日下 港鐵又再出軌了

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  真係長氣都要講多句:「港鐵流年不利!」,東鐵線今朝早正值返工高峰時間嗰陣,發生咗列車出軌及脫卡事件,列車分成兩截,橫跨咗三條路軌呀!呢啲罕有事故今年接二連三發生喺港鐵身上,Jenny仲以為管理層換咗人,可以轉轉運啦!點知仲衰多兩錢重,今鋪點搞好呢?

 

 

出完一軌又一軌 一年出足三次軌

 

  講返事發嗰陣,列車本來就入緊紅磡站,點知突然之間,第三卡車出咗軌,而第四同五卡車就跟住甩咗出嚟,兩邊好似「啪」百力滋咁,斷開兩截,再擺尾去咗旁邊路軌。好彩架車停得切,冇造成重大人命傷亡,最後有8個乘客受輕傷,係不幸中的大幸。

 

  都唔好講其他事故喇!齋講出軌,計埋今次已經今年第三單喇!3月中旬時,就因為測試新信號後備系統期間,信號軟件出錯,整咗單通車40年來首次列車相撞,其中一列兩卡車廂撞到變晒形,出埋軌,好彩就係事發嗰陣係測試信號冇載客咋!

 

  話口未完,7月又嚟多單!一列負責起吊路軌的80噸重嘅工程車,凌晨喺東鐵線大學站同大埔墟站之間,做做下更換路軌工程,點知喺彎位出軌,個轉向架偏離咗軌道,就係咁嗰日火炭至大埔墟站服務停足9個鐘!

 

評級機構穆迪踩多腳

 

  點知兩個月唔夠,就又整多單「出軌」,仲要載住客,喺繁忙時間出事!男人出軌,一次都接受唔到啦!見到港鐵家下咁出軌法,你話Jenny仲會唔再有信心?講真,如非必要,真係唔太敢搭啊!

 

  跟手評級機構穆迪仲踩多腳,下調港鐵及九廣鐵路評級展望至「負面」,話因為港鐵同九廣鐵路都係政府相關債券發行人,評級呀、展望呀呢啲,同香港政府緊密相連,所以香港評級展望降咗,自然對佢地兩個都有負面影響啦,咁就一併降埋喇!

 

  望一望後面,原來尋晚先剛剛拆掂一個「關公災難」。事關設計字體「勁揪體」嘅多媒體設計師Kit Man發現,港鐵同樂日嘅宣傳單張用咗「勁揪體」,但又冇畀使用權費喎!港鐵即刻就道咗歉,話會進行內部調查,亦都會主動同返設計師跟進咁話。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

  • 生活副刊
  • DIVA
  • 健康好人生