• |
  • 極速報價
  • |
  • 會員
  • 產品服務 / 串流版
  • 設定

12/01/2021

老婆大人廚技大躍進

  • 加入最愛專欄
  • 收藏文章
  • 曾智華

    曾智華

    曾智華,資深傳媒全面手。退休前為香港電台節目創作總監。八十年代開始獲選最受歡迎節目主持,直至2014年退休為止。隨即「轉跑道」,專攻慈善活動及變身KOL 。目前每天溜覽其Fan Page 「Luke Sir 曾智華」者,數以十萬計。近年著作包括《快樂退休》及《有盈退休》。

    每周更新

    快樂退休

Photo: 圖片由作者提供

  退休,加上仔大女大,再加上疫情限聚令,等於乜?等於有大量空間時間,正如某人名句——All I have in this world is TIME!

 

退休者擁有最多的是自由時間,可以善用,可以浪費,睇人。

 

  更碰啱菲傭姐姐莎莉放大假返鄉,今次強制兩地隔離,大件事,最少離家三個月!

 

今天外傭回鄕渡假,連兩地隔離,僱主要「痛苦」近三個月。

 

  三個月,邊個洗衫抹屋買餸煮飯……?當然係……老婆大人啦。因佢對整潔要求極高。假若由為夫做,必被罵「食嘢唔做嘢,做嘢打爛嘢!」老虎乸省完之後,佢又再做多次,盞搞。

 

我做家務雞手鴨腳,做乜都俾老虎乸省,因要佢再做一次。

 

  咁咁咁,點呢?分工囉。我的第一份「工」,是冧佢氹佢安撫佢情緒。中午帶佢歎茶煑少一餐。然後,四出搜羅最好的外賣,包括油雞滷味潮州鵝,全部現成,即買即食,慳功夫。

 

  菲傭離港已近一月,本來預咗慘情,結果……係,家中工作量大增,但出現三個良性現象:

 

  一、小弟更了解區內各式美食所在,因幾乎日日買外賣。故此,那間食肆出品得,那間水餃雲吞標青,那檔潮州滷水有料到,不停有新發現,真係正!

 

限聚令加冇菲傭放大假,我立即變「外賣之星」。

 

  二、晚餐食材質素大幅提高。眾所周知,蠱惑街市佬最愛呃菲傭,因佢哋來自窮鄉僻壤,根本冇優質豬牛肉及海鮮。所以,尤其肉檔,多以當日最劣質的貨色呃菲傭,小弟周不時食到火都滾。如今,好嘞,所有肉類蔬菜老婆大人親自出馬,海鮮則我自己選購(昨晚才歎咗條野生杉斑,正到飛起!)。結果,晚晚開餐時就是全日最快樂時光,有口福也。

 

  三、老婆廚技大躍進。正所謂工多藝熟,任何事,起初難,但日日做,只要用心,必定進步。呢呢呢,為夫就見證老婆大人廚技,一個月內,不停進步。由「也也嗚」到普普通通。再由普普通通到有點料到。再由有點料到出現強項!小丈夫我立時封佢為家中廚神。總之,晚晚老婆大人出品我就掃清,一碟不留,汁都撈埋,以示欣賞!(冧到佢失暈)。

 

老婆大人廚功飛躍進步,泡製蒸海斑及蜜糖燒雞亦已具事業水平。

 

  不過,冧完,全日最令人厭惡的工作,又要展開。正是清洗如山積肥淋淋的碗碟及煲鑊。

 

餐後最頭痛,解決山積油淋淋碗碟。

 

  哎吔,真真又辛苦晒老婆大人。

 

  到最後,仍是非常掛念菲傭莎莉姐姐。究竟,佢幾時先可以回來幫我全家甩難呢?

 

我與小狗哈仔都日日在問:「莎莉,你幾時返來俾我哋甩難呀?」

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet TV頻道現已登場,多元化財經及消閒影片輪流送上! ► 即睇

我要回應

你可能感興趣

放大顯示
保哥快趣煮

精選文章

  • 生活
  • DIVA
  • 健康好人生