• |
  • 極速報價
  • |
  • 會員
  • 產品服務 / 串流版
  • 設定

16/03/2021

快樂退休之星:香樹輝

  • 加入最愛專欄
  • 收藏文章
  • 曾智華

    曾智華

    曾智華,資深傳媒全面手。退休前為香港電台節目創作總監。八十年代開始獲選最受歡迎節目主持,直至2014年退休為止。隨即「轉跑道」,專攻慈善活動及變身KOL 。目前每天溜覽其Fan Page 「Luke Sir 曾智華」者,數以十萬計。近年著作包括《快樂退休》及《有盈退休》。

    每周更新

    快樂退休

Photo: 圖片由作者提供

  過去十年,同輩老友一個又一個退休。男的,尤其高官, 十之七八不太快樂,因冇咗權也冇咗責,即係冇咗個供人欣賞自己貢獻的舞台。冇舞台,等於冇得表演,冇晒觀眾。咁,就算衣食無憂也多要日日唱蔡楓華名曲——《絕對空虛》。

 

  不過,總有例外的。例如「中環花蝴蝶」及「中大護法」香樹輝,小弟百分百肯定,佢將會是一位快樂退休之星。

 

多年來瞓身「中大護法」角色,獲頒榮譽院士,實至名歸。

 

  先由人緣開始講。阿香朋友遍天下,點解?因看台公論,百份百坦蕩蕩君子,以誠待人,冇架子。老中青男女皆可溝通。最重要,守信用!

 

  我點知?因身受!1994年,香樹輝(一時衝動?)重資購入已蒸發的《華僑日報》,做其大老闆。一上場,切底改革,小弟是其中一被邀寫稿的。

 

  老朋友叫到,唔使講稿費,立即效勞。

 

  結果,不幸地,終因經營太困難而停刊。理所當然,阿香蝕到眼攤攤。

 

華僑日報停刊當天,香老闆無奈又感觸。

 

  如此情況,一般東主都不會再找尾數,反正已執笠。事實,我當時亦全無要求,更冇追數。

 

  豈料,半年後,支票送到,香老闆一個仙也找清!

 

  由此可見,香樹輝的品格與風骨。事實,佢亦周身刀,所以,工作邀約不絕。除以多個筆名寫專欄,出任過多份報章及刊物高層行政人員外,更長期擁有自己的公關公司,為全港不少大機構出謀獻策。

  

  約廿年前,開始於新城電台主持早晨黃金時段。未落實前,小弟建議佢一定要「開天殺價」!因當年電台早晨節目,聽眾有二百多萬。本來,主要由我的《晨光第一線》及鄭經翰的《風波裏的茶杯》瓜分。新城欲加入戰場,等於希望重錘出擊。作為老友,我大力鼓勵佢吊高嚟賣,俾唔夠咪做!

 

憑藉香Sir的江湖地位,新城台才能邀得重量級嘉賓。

 

  這世界,永遠是人求你時,特別吃香。聽講,新城開的價,乃廣播界頂級,香生收入不菲矣。

 

  今天,香樹輝已七十開外,enough is enough ,決定由前線退下,做埋今個月封咪。佢退休生活,肯定快樂。因可以專欄照寫(多三兩個?)外,老友百計排隊約食飯(當然包括我呢隻為食鬼!)。最重要,一星期繼續投入兩次賽馬及湊孫。疫情過後更可四圍飛,個個月到佢「第二家鄕」曼谷歎世界。

 

  不少人慫恿阿香開YouTube Channel,專講波、馬、投資及江湖秘聞。

 

香樹輝熱愛賽馬,經常以馬主身份出現凱旋門。

 

  咦喂,都係小弟強項噃,預埋我一份呀!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet TV頻道現已登場,多元化財經及消閒影片輪流送上! ► 即睇

我要回應

你可能感興趣

放大顯示
周一加油站

精選文章

  • 生活
  • DIVA
  • 健康好人生