• |
  • 極速報價
  • |
  • 會員
  • 產品服務 / 串流版
  • 設定

25/10/2022

幽默大作家

  • 加入最愛專欄
  • 收藏文章
  • 曾智華

    曾智華

    曾智華,資深傳媒全面手。退休前為香港電台節目創作總監。八十年代開始獲選最受歡迎節目主持,直至2014年退休為止。隨即「轉跑道」,專攻慈善活動及變身KOL 。目前每天溜覽其Fan Page 「Luke Sir 曾智華」者,數以十萬計。近年著作包括《快樂退休》及《有盈退休》。

    快樂退休

    每周更新

Photo: 圖片由作者提供

  高手在民間!我講乜高手?正是棟篤笑高手!小弟拍心口講,若佢肯公開演出,大家必會認同,功力不下於城中幾位「揾食」的棟篤笑高手!

 

  此君是誰?正是剛剛卸任的前馬會主席陳南祿(Philip)!平時身份關係,除著到嚴肅行政人員款外,任何涉及公司場合,更不能亂搞笑,要代表機構形象也。實則,Philip乃百分百幽默大師。

 

陳南祿周身刀——彈得、寫得、管得(大機構)…,但冇人知佢「楝得」(講楝篤笑)。

 

  我點知?因上周在新書《馬不停蹄》發布晚餐中,佢要上台講30分鐘棟篤笑。

 

新書發布晚餐夜,好玩至極,我一於大鞭「殺」落前局長聶德權身上,當佢係馬!

Philip 玩得,客人個個也玩得,扮睇禁書,冇面見人。

參加者不單刻意打扮,更帶同馬鞭出席。

 

  老友,你可知普通人,度一隻笑話都搲爆頭,而佢,要講足半小時,可以想像難度幾高?

 

  不過,攔不到老陳。看似氣定神閒臨時爆肚(冇一個棟篤笑專家會如此!),實質度咗三日三夜,效果就是——笑到大家反肚!

 

  笑話重複,一定冇現場效果。但仍可引幾段大家聽聽,都幾過癮:

 

陳南祿講楝篤笑,木口木面,但觀眾笑到碌地。

 

  一、唔該幫幫手,為免我本新書掉晒去堆填區,陰公又唔環保,大家請一齊做勢,明日開始,不停喬裝各種外型,走遍全港書局。凡發現冇入《馬不停蹄》的,就大大聲話同老闆:「喂,有冇搞錯,咁爆都冇得賣?快快替我預留十本! (現場100人,若個個做幾次,必有雷霆之勢! )

 

  二、請各位做好心,明日開始,搭任何公共交通工具都攞住我本書,高高舉起嚟睇!拜託。

 

  三、我出過成十本書, 但絕對唔敢去書展。點解?因怕與其他受歡迎作家同場,佢哋有條龍索簽名,我就拍烏蠅,咁咪揾窿捐?再者,更大恐懼,為見到「兩蚊任攞」區見到自己本書!

 

  四、我也不敢上圖書館。因明知必定會多手攞自己作品揭,矛盾死!若冇人借過,真係撼頭埋牆。但若好多印仔顯示受歡迎,也會滿不是味兒。因代表班友唔肯買我嘅書!

 

《馬不停蹄》一出版,立即打上暢銷書榜,可能人人憧憬有馬圈猛料爆。

 

  以上,當然全部搞笑。實則,佢本書一出已上咗「暢銷書榜」極高位,兼且,凡有簽書會都排大隊。最誇張一次,有城中名人要排足兩小時!

 

  《馬不停蹄》厚達360頁,Philip本應將馬會生涯盡訴的。不過,佢坦白承認,寫此書時,作為馬會主席,有以下紅線,必須堅守:

 

  一、涉及馬會高層、董事及騎練的私隱。

 

  二、有關保安事務。例如涉及圈內人與外圍。

 

  三、澄清或證實傳聞(馬圈之內多的是,日日滿天飛)。

 

  四、馬會歷史上不光彩的事件(造馬及拘捕騎練)。

 

  五、嚴重令人神傷的意外(多是關於騎師傷亡)。

 

  六、任何涉及政治議題的。

 

  七、直接批評任何重要人物或機構。

 

  當然有更多更多。但卻絕不影響這書的內容吸引性及豐富的回憶與揭露(鮮為人知的趣人趣事)。

 

當晩彩蛋,介紹etnet 大hit性節目《男男女女、嘉點情趣》。

Philip 魅力驚人,某大集團女CEO一見佢,即變小粉絲。

 

  此書所有收益,全捐「世界自然基金」(WWF.HK)

 

  大家一齊做善事,支持幽默大師陳南祿!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新節目《說說心理話》原生家庭對成長有咩影響?改善溝通有計可施?► 即睇

我要回應

你可能感興趣

放大顯示
風水蔣知識

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ