• |
  • 極速報價
  • |
  • 會員
  • 產品服務 / 串流版
  • 設定

14/11/2023

請客搞到變「大頭仔」

  • 加入最愛專欄
  • 收藏文章
  • 曾智華

    曾智華

    曾智華,資深傳媒全面手。退休前為香港電台節目創作總監。八十年代開始獲選最受歡迎節目主持,直至2014年退休為止。隨即「轉跑道」,專攻慈善活動及變身KOL 。目前每天溜覽其Fan Page 「Luke Sir 曾智華」者,數以十萬計。近年著作包括《快樂退休》及《有盈退休》。

    快樂退休

    每周更新

  最近,老友C哥「奔七」,諗住一生人一次,決定做大壽!結果,人生最大煩惱由此起,搞到變「大頭仔」。

 

人生活到七十仍健健康康,大喜事,絕對值得恭賀。

 

主人家當然希望將壽宴搞大佢,與各路友好同飲共歡。

 

  因為,人與國家一樣,有歷史。即是,有恩怨情仇。你睇睇美國與俄國、以色列與巴勒斯坦、南韓與北韓、北京與台灣民進黨⋯⋯無論邊個做喜事,都冇可能請到對方願意坐埋共歡舉杯,諗都唔使諗!

 

  總之有佢冇我,永不同一場合出現,以免篤口篤鼻。更甚,可能一言不合,打起上嚟。

 

人與人、國與國,皆可能存有恩怨情仇,不少根本不會見面,更遑論同枱舉杯。

 

  人也一樣,無論同學、同事以至親戚,日久必有恩怨,暗中心態——老死不再往來。

 

  究竟有乜過節,未必人人知,也不會公開,但總之就是任何場合,有你冇我!

 

我的哲學也如是……大家日子不長了,不想見的人,實在無謂勉強互相應酬。

 

  初初出社會工作,上司乃香港公關祖師級人馬,整個官界、商界、政界及傳媒界的人際人脈,全盤掌握。

 

  故此, 機構一年搞一次的大型活動,佢必親自決定晚會排位。

 

  「阿碌,此乃一項藝術。將不適合的人放在一起坐,小的,就嬲你唔知,話你又唔好意思;大的,當然全部諗藉口失蹤,令你個晚會慘變拍烏蠅!」

 

  人與人之間、國與國之間的結怨,經常一匹布咁長,更沒甚麼絕對「你啱我錯」之類。故此,人際關係高手,一定暗暗掌握邊個同邊個絕不可編同場或同枱。

 

任何大型宴會,應請誰不應請誰?誰應或不應與誰坐?皆大有學問。

 

  回說我的老友C哥,縱橫江湖,交友無疆界,點知,一到請客,大件事。

 

  F佬講到明:「C哥,唔好嘞,我知你會請阿D,佢正『牛仔褲人(賤人)』,出賣良心出賣機構眼都唔眨,我見到佢一定兜巴星,質問為乜好地地有正常人唔做,臨退休竟為權為錢出賣人格?真係講起佢都想嘔!」

 

  有啲更旗幟鮮明,例如L君:「C哥,我已經退休多年,以前同事,有啲想見,有啲唔想見。同樣,江湖中認識的人,也是有啲想見,有啲呢世都不希望再相遇,你賓客中必有以上兩類人,請放過我一次啦!」

 

  弊在,F佬與L君,正正是主人家好想佢哋出現,因極具「代表性」也。咁點呢?於是猛落嘴頭,動之以長年的感情。

  L君見甩唔到身,惟有出絕招,向「奔七」老友非常誠懇咁講:「大家年紀已不小,無謂轉彎抹角,我與邊類人道不同,你咁精明,當然知。為免破壞你個壽宴氣氛,不如我另搞一個同聲同氣壽宴賀你啦。」

  「唔係喎,我真係好想你嚟啊!」C哥鍥而不捨。

  終於, L君使出絕招:「老實,唯一我會出現,是你畀我參與決定嘉賓名單,以保證融融洽洽歡歡樂樂度過一晚。」

  咁離譜的絕招都講得出,C哥服晒,知冇彎轉,只好打退堂鼓。

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【etnet全新YouTube頻道】「25度生活」,舒適溫度 ‧ 綠色態度 ‧ 樂活自在!► 立即訂閱

我要回應

你可能感興趣

放大顯示
吾港吾知

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ