• |
  • 極速報價
  • |
  • 會員
  • 產品服務 / 串流版
  • 設定

22/07/2021

《經濟不停學》油價上落要睇OPEC,但成日都有拗撬

  • 加入最愛專欄
  • 收藏文章

   孖屐講油價,焦點多數離唔開增/減產協議,而呢啲協議就係喺OPEC(石油輸出國組織)討論出嚟嘅,成員國嘅決定足以撼動原油供應,連帶影響全球企業嘅生產成本。今日就嚟講下OPEC嘅運作機制同喺世界大事中扮演嘅角色。

 

  OPEC依家由13個國家組成,包括利比亞、阿拉伯聯合酋長國、阿爾及利亞、尼日利亞、加蓬、安哥拉、赤道幾內亞、剛果、 伊朗 伊拉克 科威特沙特拉伯 同委內瑞拉。據2019年數據,佢哋控制住逾75%嘅已知原油儲量,成個組織供應嘅石油約佔世界石油總量近42%。

 

  OPEC每年都會喺維也納總部開兩次常例會議,多數隔六個月一次。另外如果有成員國要求,而且多數成員國批准就可以開特別會議。到時會決定成員國同某啲非投票觀察員國嘅石油生產配額,目的係透過控制供應嚟影響原油價格,確保石油市場穩定。

 

  而喺會議上每個成員國都有一票,任何政策變動都要全票通過先可以實施。其他國家喺得到大會同意後可以觀察員身份參加,一齊協調生產水平,但就冇投票權。

 

OPEC成員國嘅俄羅斯拒絕妥協,係期油負價原兇之一

 

  不過,冇投票權唔代表冇say。以俄羅斯為例,係世界第二大產油國,因為夠大,所以惡得起,OPEC都要畀番幾薄面,如果唔係,搲爛塊面可以好大劑。

 

頁岩油嘅製作方法係加熱分解油頁岩,令岩石入面嘅有機物質轉變為合成石油天然氣合成原料。所得油狀物可以即刻作為燃料或供應畀煉油廠(shutterstock圖片)

 

  2014年起,美國通過增加頁岩油產量持續擴大市場份額,搞到石油價格兩年間急跌近八成。2016年尾OPEC宣布減產並聯同非成員國俄羅斯,哈薩克墨西哥達成協議,OPEC+概念就係喺呢個時候出現。

 

  上年初新型肺炎打到嚟,OPEC想繼續減產,經過多番斡旋俄羅斯都係唔制,理由係認為減產唔應該局限於OPEC+,如果唔係就等同於將市場份額拱手相讓畀美國。雙方談判破裂後,沙特阿拉伯報復性增加石油開採量,日開採量試過增至逾1200萬桶,係日產量新紀錄。

 

  雖然OPEC+到復活節達成協議,單日減產970萬桶,但疫症嘅流行令原油需求持續低迷,加上五月西德州原油期貨就嚟結算,一眾孖屐炒家冇可能拎實體原油,只好瘋狂掟期貨合約,沽無可沽下終於出現令唔少投資者印象深刻嘅期油負價,紐約時間420號下午2點半左右出現咗每桶最低負4032美元嘅價格,係自1983紐約商品期貨交易所開始交易以嚟首次跌穿0蚊美金。

 

全球低碳轉型,維持內部團結挑戰愈大

 

  由石油危機到海灣戰爭再到新型肺炎疫情爆發,歷史證明OPEC成員國自己都唔算團結,因為有唔同利益盤算,所以經常會有生產配額糾紛。早排阿聯猶不滿獲分嘅供應配額過低,一度連會都開唔成,罕有咁同沙特意見相左,再為面對全球低碳轉型的前景加添不確定性。喺穩定市場價格同增加自身份額之間,特別係喺全球石化能源需求見頂前,維持OPEC內部記律同團結嘅挑戰愈嚟愈大。

 

撰文:吳藹林

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新消閒節目《周一加油站》,幫你踢走悶氣,重新注入元氣! ► 即睇

我要回應

你可能感興趣

放大顯示
周一加油站

精選文章

  • 生活
  • DIVA
  • 健康好人生