《小傳日記》賭仔雖四散，好在友邦撐；Ａ場Ｖ型彈，香江升勢猛！

　　花旗國「侵侵」噚晚（２６日）公布稅收方案，雖然確定咗將商業稅率降到一成半，但未見詳細資料，加上缸友驚通過唔到國會，結果花旗國魚缸腳軟番唞一唞。
　　今日香江期指結算日，重磅股ＡＩＡ（０１２９９）首季份成績表相當靚仔，一朝早就彈起半成，幫手撐起魚缸高開８４點，之後隨著Ａ場跌得唔少，賭仔又唔生性，搞到一度倒跌１２３點，好在食完午飯後Ａ場又有番生氣，魚缸再次回升番，全日就踢起１２０點，收報２４６９８點，連升第四日期間累漲６５６點或２﹒７巴仙，今日最高見２４７１７點創超過一年半高位。
　　Ａ場今日Ｖ型反彈，跌近１﹒４巴仙之後最終回升番０﹒４點，報３１５２點，勁！國貨佬就腳軟５６點，報１０２６１點。整日主板成交有７６３億銀，少過噚日３巴仙。

＊友邦業績靚大行都話正，金沙被唱淡渣打牙斬斬＊

　　賭仔金沙（０１９２８）阿媽公布業績，順手講埋阿仔首季按年多賺１２巴仙去到３﹒５億美金左右，雖然經調整物業ＥＢＩＴＤＡ好過預期，但畀野村同德銀等削佢目標價，搞到金沙賺多咗錢都要瞓低近４巴仙，報３５﹒５５銀，做埋今日最渣藍戰士；另一藍戰士銀娛
（０００２７）跟住尾趴低近３巴仙，報４３銀。
　　ＡＩＡ首季新業務價值增加五成三，去到８﹒８億美金，創埋上市以嚟季度新高，獲多間大行垂青，全日彈起超過６巴仙，報５４﹒５銀，係今日最叻藍戰士。
　　渣打（０２８８８）份成績表都好威，首季除稅前法定溢利近十億美金，按年多一倍咁濟，缸友隨即炒起近半成，報７５﹒４５銀。街坊大笨象（００００５）叨一叨光，行前半個巴仙，報６４﹒４銀。
　　
＊回購就結束恒大縮一縮，營運數據好通達創新高＊

　　內地磚頭就無咁開心啦，萬科（０２２０２）跣低近２個巴仙，報１９﹒９銀，事關佢噚日叫停發債之後，１２個西安項目銷售又被叫停。頻頻回購嘅恒大（０３３３３）可能已經係強弩之末，摩通話回購力度收細番，可能就快回購完，今日跣低近６巴仙，報８﹒２２銀。
　　通達（００６９８）首季營業額按年增加三成，連升兩日之後今日繼續跳起超過１巴仙，報３銀，仲試過高見３﹒０８銀破頂。
　　北水股埃芝芝（００７９９）繼續尋頂，今日跑前近３巴仙，報１１﹒８８銀，最勁去到
１２﹒３４銀創新高。

＊摩通來唱衰民行向後退，平保業績前先升一巴仙＊

　　一眾神州錢莊陸續放榜，民行（０１９８８）第一季賺１４２億人仔多３﹒６巴仙，但摩通話對佢利息淨收入等下跌感到失望，繼續叫「減持」，民行結果都要趴低近２巴仙，報７﹒７６銀。建行（００９３９）、招行（０３９６８）績前都畀佢嚇一嚇，分別碌低唔夠半個巴仙同近３巴仙，收６﹒３４同２０﹒５銀。
　　內險平保（０２３１８）拎成績表前就充滿信心，行前１巴仙，報４４銀。國壽
（０２６２８）績前卻腳軟，得返２３﹒７５銀。
　　至於中電信（００７２８）首季多賺４﹒５巴仙至超過５３億人仔，但依然冇咩刺激作用，全日打個和，收３﹒８３銀。

＊引入投資者普匯表現靚，廣深季績曳敏實呈跌勢＊

　　普匯中金（００９９７）附屬引入兩名投資者，夾埋會泵水２﹒２億人仔，普匯今日復賽後飛起一成，報１﹒３２銀，勁！
　　至於匯思（０８１４７），之前宣布控股權會易手之後，噚日一度升超過一倍，今日就回落逾２５巴仙，報０﹒１４銀，升幅未完全消除晒。
　　廣深鐵路（００５２５）公布季績，首季少賺一成四至２﹒８億人仔畀大行降目標價，消息拖累廣深鐵路跣低近８巴仙，報４﹒３１銀。
　　敏實（００４２５）控股股東秦榮華身兼兩職，既做董事會揸弗人，又做埋行政總裁，喺今年９月１日起生效，不過孖屐好似嚇親咁，缸友相繼拋貨，敏實埋單唔見１１巴仙，報２８銀。
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。