美國眾議院議長佩洛西訪台消息沸沸揚揚，先唔講兩岸網民熱烈討論，股市已經先行反映恐懼，中港台股市受壓同時，東北亞地區連帶日本、韓國股市都跟跌，足以顯示佩洛西有如颶風一樣嘅震撼程度。
傳咗幾日嘅佩洛西訪台終於「可能」喺今晚上演，直到最後呢幾個鐘，都仲未有正式公布係咪落實行程。事前兩岸軍隊都各自進行演練，隨著時間的推移，佩洛西起程令到局勢持續升溫。噚日解放軍東部戰區透過微博官方帳號表示會聽令而戰，風聲鶴唳下今日上晝台北桃園機場收到炸彈恐嚇話要阻止佩洛西訪台。據講白宮方面都唔太同意佩洛西訪台，但係佩洛西一意孤行，美軍唯有加強保護佩洛西人身安全。
有傳今次佩洛西亞洲之旅，主要係向亞洲區國家嘅晶片企業解釋新鮮滾熱辣出爐嘅《晶片法案》，當然晶片龍頭台積電都有份，佩洛西自然有重要原因想親自去解釋。講起晶片業，美國一邊向全球晶片企業大舉出手，但係神州方面就陷入「恨鐵不成鋼」局面，過去呢一個禮拜神州掀起「芯腐敗」；半導體發展幕後推手、俗稱「大基金」嘅「國家集成電路產業投資基金股份有限公司」多位高層被中紀委帶走調查。包括紫光集團聯席總裁刁石京、華芯投資總裁路軍、紫光集團總裁趙偉國，同埋國家集成電路投資基金總經理丁文武相繼落馬。
雖然兩件事未必係有關連，但係美國磨拳擦掌托展晶片事業，呢頭神州「大基金」無甚進展，南開大學新聞與傳播學院院長劉亞東就話，「大基金」成立以來喺股票市場不斷高價套現，但基本上無推動過技術突破，批評神州晶片業沉疴已久，個別項目甚至停工爛尾。眼見美國高調介入全球晶片行業，而「大基金」不作為就更加令人激心，所以就掀起呢場名為「芯腐敗」嘅「問責」，亦都有可能催化咗神州方面唔想畀佩洛西成功訪台嘅情緒。請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
38,527.00
