魚缸靜局咗幾日，其中醫藥股雖然今日回返些少，不過呢期整體走勢算係穩一啲，博客都想留意返多啲。噚日藍籌中生製藥(01177)放榜，都令博客有啲驚喜。
中生製藥公布，截至今年6月底中期純利30.17億人幣，按年增1.4倍；經調整純利就係15.35億人幣，按年多14%；期內收入多11%達158.74億人幣；創新產品收入增長近15%達61.3億人幣。而其中最重要就係，宣派中期息3仙港紙，比上年2仙都叫多咗一半。
以分部收入嚟睇，癌症藥物係中生製藥嘅收入主力，期內收入達53.6億人幣，按年增加19%，佔期內收入超過33%。集團期內流動資金充足，期內流動現金結餘有85.49億銀，所以今次業績賺錢，都有能力喺派息上面反映。
講咗咁多，最重要都係有息派，派多咗息起碼都為股價打返個底。今朝中生製藥最多升超過6%，雖然午休升幅收窄，但目前股價仍然穩守今朝突破嘅3蚊關口以及係250天牛熊線。以走勢計，3蚊阻力頂咗兩個幾月，而牛熊線更加係由上年底已經一路限制股價升幅，換句話講如果股價今日收市守得住3蚊，實際上已突破大半年以來嘅阻力，後市都會比較樂觀。所以博客覺得現價3蚊附近都幾值博，短中線可以挑戰返3.9銀，收穿2.9止蝕都唔會蝕好多！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
41,622.08
17,592.13
