魚缸上個禮拜衝唔到條百天線，呢兩日都要捱吓沽先，不過睇返呢兩日嘅成交額都一路縮緊，睇嚟條五十天線兼兩萬四裂口位都「很堅強」，只要喺呢條線以上都可能隨時準備再挾一輪架！
講返今日魚缸雖然都係收跌，但係長期坐艇嘅賭仔今日就獨領風騷！皆因上個禮拜五馬交政府終於公布咗引頸以待嘅賭牌修例草案，都同之前傳出嘅消息差唔多，最多批六個正牌（好明顯係為而家呢六間度身訂做啦），禁副牌，馬交居民嘅持股量唔可以少過15%。最驚喜當然係盛傳會有官方人士加入博企呢點，亦都係西洋賭仔最驚嘅，最後都無出現到。所以今日賭仔齊齊開香檳，而西洋賭仔更加係大放煙花；金沙(01928)升超過一成四，報21銀；永利澳門(01128)升近一成二，報7.33銀；美高梅(02282)升近一成二，報5.25銀。
雖然「今天應該很高興」，但觀乎官方嘅做派，馬交賭業嘅前景恐怕係夕陽西下。民間一直有傳當日洗米華被捕，其實係因為佢都想自己攞個賭牌嚟做，但阿爺大方向就係唔想神州境內有地方賭業咁盛行，所以就順勢大打跨境賭博，一來重創跨境賭博呢一個「非法行業」，二來亦都暗示唔想再有一個賭業鉅頭出現，同時限制馬交賭業個餅繼續做大。
所以「倒米」之後，好多賭仔都即時自「斷米路」，將疑似同洗米華有關嘅貴賓廳業務關門大吉，亦都係響應返阿爺唔想瓜田李下令賭業有洗黑錢嫌疑。
所以限制六個賭牌，聽落係維持咗現行六個賭仔嘅水路，但係無咗貴賓廳呢個重大收入之後，個個都要單靠大廳維持收入，靠人流反映收入，變相競爭都會激烈好多。同時一路都講緊，馬交唔可以單靠賭業同旅遊業做單一經濟發展。所以可以預見，未來六個賭牌只會有少無多，亦都反映返馬交政府唔想「單天保至尊」嘅發展方向。所以賭股入唔入得過，就要自己諗諗喇，請請！
| 股份(編號) | 現價(元) | 變幅(%) |
|---|---|---|
| 金沙(01928) | 21.00元 | 升14.63% |
| 永利澳門(01128) | 7.33元 | 升11.91% |
| 美高梅(02282) | 5.25元 | 升11.70% |
| 銀娛(00027) | 45.00元 | 升7.02% |
| 澳博(00880) | 5.43元 | 升4.83% |
| 新濠(00200) | 9.72元 | 升5.08% |
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
38,518.89
