虛擬貨幣近年發展迅速,但黑客做嘢仲快過執法者同消費者,結果唔只招致損失,虛擬產品交易所仲分分鐘賠上聲譽。
近日接二連三傳出虛擬產品交易所被黑客入侵或被劫嘅不幸消息。繼Crypto.com上星期被黑客偷取3000萬美元(約2.4億港元)嘅比特幣同埋以太幣之後,早兩日全球最大NFT交易所Opensea被黑客睇準漏洞,強行以超低價進行「籃籌NFT」交易,涉及資金過百萬美元(約780萬港元)。
喺今次嘅相關交易裡面,黑客喺12個鐘之內買咗至少8項貴價NFT資產,當中包括Bored Ape Yacht Club、Mutant Ape Yacht Club、Cool Cats、Cyberkongz等。其中Bored Ape Yacht Club #9991被黑客強行以0.77以太幣(約1848美元或15000港元)成交,一轉個頭就以84.2以太幣(約20.2萬美元或157.3萬港元)轉賣,唔使半個鐘就勁賺137萬港元。
但綜合網民和傳媒的cap圖同埋報道所講,交易漏洞早喺舊年6月就曝光,Opensea亦有回應證明知悉,只係到今年1月都仲未修復好,結果就造成而家嘅不幸嘞。
盈盈就諗,當大家瘋狂進行虛擬貨幣交易嗰陣,有無諗過自身得到幾多保障呢?睇嚟監管機構必須致力趕上科技發展步伐補鑊同時,消費者最好都係做多啲功課,急急了解吓自己究竟其實做緊啲咩交易,同埋最終係令自己定係罪犯獲利嘞。《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇