《炒股戰記－施富》魚缸跌穿250個月線，忍一忍手減少出事！

　　7月魚缸夾埋跌1703點，走勢按月睇每況愈下，8月個頭又開得唔太靚，富仔睇住魚缸張月線圖，心都寒埋……加埋其他不明朗嘅因素，魚缸短期仲有機會受壓，今期唔會新加任何股票，並且會沽出一啲股票，揸番啲cash喺手先，等啱時機先入貨！

*爛尾樓斷尾未？*

　　大家都好關心加息問題，鮑威爾就同大家派定心丸，7月聯儲局一如預期加息0.75厘。鮑威爾話，隨住貨幣政策立場進一步收緊，相信未來加息步伐會減慢。雖然美國7月核心通脹進一步回落到5.9%，油價亦無再嘭嘭聲咁衝上去，但美國GDP連續兩季收縮，都唔係一個好嘅訊號。多國公布嘅製造業數據亦麻麻哋，反映經濟環境仲係差，魚缸今個月要大升絕對唔容易。
　　另一個係內房問題。大家都知內房債務纍纍，仲有唔少內房停緊牌，或者放唔到榜。上兩個星期又爆多單轟嘢：斷供「爛尾樓」！既然內房企業遲遲交唔到樓，啲人索性唔繼續供樓，迫啲開發商快啲搞掂佢，結果引發多隻內房股7月暴跌，淨係碧桂園(02007)7月跌咗超過37%。據報阿爺已經出聲，希望銀行將貸款額提高到一萬億元，幫助開發商完成停工樓盤，但富仔覺得出現問題嘅內房企業數目太多，呢一萬億係咪咁簡單KO晒所有問題呢？更大問題係啲人已經無晒信心買樓，爛尾樓未知幾時斷尾，樓市keep住咁弱，魚缸又係要硬食。
　　講到最轟嘅當然係中美關係。習主席同拜登通過視象會議，但唔見有提到關稅問題，成個通話無為「孖屐」帶嚟驚喜，惟有繼續保持對話。誰不知，年屆82歲嘅美國國會眾議院議長佩洛西正式訪台，北京連番講到「拭目以待」、「麻煩製造者」等言詞，就睇到阿爺嬲到沖天。一個喺美國政界舉足輕重嘅老人家，仍然唔理中方反對，照樣踩入台灣。今次美國呢步棋行到咁，仲可唔可以同中方和氣咁保持對話呢？除非事態發展突然整個「華麗轉身」，如果唔係都會燒到魚缸。

*電盈4.22銀沽出7000股*

　　你一拳，我一腳，魚缸7月翻唔到身之餘，仲搞到周身傷。更大鑊嘅係，魚缸7月收低於250個月平均線，係有紀錄以嚟第一次失守呢條「終極防線」，魚缸長期走勢已經逐步向下。雖然目前仲係月頭，但繼續畀條10個月線壓到實一實，連20個月線都跌穿100個月線，情況唔樂觀呀。技術走勢轉差，利淡因素增加，富仔無謂「明知山有虎，偏向虎山行」，今期決定忍一忍手，睇下過多兩個禮拜有無好轉，先再決定點部署。
　　睇番個倉，電盈(00008)7月初到中旬走勢都唔錯，點知就整單MIRROR演唱會意外，搞到有一位dancers受重傷，政府甚至勒令暫停舉行演唱會，並且展開全面調查。富仔一睇到呢單news，個心嚇到嚟一嚟，完全想像唔到會喺演唱會發生咁嚴重嘅意外，作為主辦單位嘅ViuTV仲有好多手尾要跟，即使集團基本面未有太大問題，但MIRROR意外好影響集團廣告等收入，亦打擊到品牌聲譽，短線走勢亦轉差。所以，富仔喺事發後一日喺4.22銀沽走7000股，仲有最後3000股就睇埋嚟緊事態進展如何，再決定沽唔沽出。
　　至於美團(03690)跟住魚缸跌，走勢比較平淡，前幾個交易日更加跌穿過當初定嘅止蝕位175銀。依家10天同20天線又開始跌番轉頭，技術上要升番上210銀唔容易，加上持倉量佔比唔細，富仔最終喺7月29日喺175銀平倉，損失未致太嚴重。

　
　　　　　　　　　　　　　　　　 　 沽出之股份及盈虧