農曆新年假期返到嚟，阿臣先喺到同大家拜個年，祝大家今年身體健康，財源廣進。
喺新年期間，雖然中港兩地魚缸休市，不過外圍就發生咗好多事，歐盟、英國、澳洲都分別下調今年經濟增長預測，再加上中美貿易戰似乎時傾時停，魚缸都係喺２８０００關口位整固，上下波幅唔多，一個「悶」字啊！
＊聯儲局主席放鴿，美元反轉強＊
講返外圍阿臣最近發現咗一個現象，或者可以同缸友分享下。聯儲局主席鮑威爾早前「放鴿」，不論係香江定花旗國嘅魚缸都有反彈，香江呢邊連升六個星期累積升達２４４２點，而花旗國就以標普５００指數為例，就由上年１２月低位２３５１升逾１４巴仙到噚晚（１２日）收市２７４４點。不過，有留意埋債市嘅缸友，亦會發現投資者同時對花旗國十年期國債有同樣需求，美債孳息已經由２﹒７厘嘅水平，跌到２﹒６厘嘅水平，債價上升債息下跌，意味投資者同時對債券嘅需求增加。資金唔單止係流入美股美債，同時仍走入日債同德國國債，日債同德債收益率曾經鈔別去到兩年同兩年半低位。
外媒分析資金同時流入股債兩個孖屐，係「唔正常」嘅現象，分析話反映投資未對環球經濟有憂慮，而現時標指亦自１２月初以來首次收在２００天線之上，咁表示標指仲喺一個良好嘅上升勢頭上。報道引述富國銀行（Ｗｅｌｌｓ Ｆａｒｇｏ）分析，最後結果可能資金再次流出債市，令到十年期美債息再次重上３厘嘅水平。缸友如果唔係善忘，應該都仲記得嚿年美債息重上３厘之後，香江股缸跌成點，大家都要有心理及實際準備好啲。
要講避險情緒，另一個現象都值得缸友留意。美匯指數喺聯儲局主席「放鴿」下，唔單只無走弱到，反且變得更強，星期一（１１日）更加連漲８日，係兩年嚟最長升勢，曾經重上９７水平，現時報９６﹒６７，但仍然高過嚿年１２月中聯儲局加息０﹒２５厘之後嘅水平，而更加「奇怪」嘅現象係，金價即使喺美金走強之下都無咩下跌，仍然企喺１３００美金呢個重要支持位，對比之前美匯指數喺９７嘅時侯，金價都只係喺１２６０至１２５０美金嘅位置，無疑係大家對經濟前景都唔樂觀，「十五十六」所以買定兩手準備。美元若果繼續強勢之下，對新興市場都唔會有好處，隨時令到市場再陷入困境，對香江亦唔會係一個好處。
現時香江魚缸多次喺二萬八關口唔上唔落，同時似乎想企上２５０天線嘅位置（約２８３５１點），但後市點走好大機會都係睇聽日（１４日）起中美貿易會談會點行，但喺有結果之前，缸友們或者先減減磅會比較明智。
＊金界業績惹憧憬，現價可買入＊
現時指數似乎都係唔上唔落多，或者又要重返上年一句大家都講嘅「炒股唔炒市」，要留意一啲強勢嘅股份，５Ｇ概念股自然不再話下，古臣同時幾睇好一隻今日將公布業績嘅金界（０３９１８），佢上年９月底止頭三季博彩總收入大約係１０﹒７１億美金，按年大升約９３﹒６巴仙，而２０１７年整年收入有９﹒５６億美金，就咁睇單計上年頭三季已經超過２０１７年整年收入，所以上年嘅成績應該唔錯，但現價略高亦防業績有咩差錯，所以穩陣啲，缸友可以睇埋今日業績如何再考慮買入。
另外，兩隻魚毛新創建（００６５９）同潤電（００８３６），前者今日最高見１９﹒８銀，再上２０銀似乎無難度，後者亦彈上１６銀關口，不過已經見到明顯阻力，或者再上仍要等一段時間。
表列截至２月１３日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
寶勝 １００００股 １﹒５６元 １﹒５３元 １５３００元
新創建 １０００股 １７﹒２４元 １９﹒５６元 １９５６０元
華潤電力 ２０００股 １５﹒９０元 １６﹒０２元 ３２０４０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ６６９００元
剩餘現金 ： ８９３７０元
組合淨值 ：１５６２７０元
組合本月收益表現： ＋ ３﹒８％（截至上月底止組合淨值：１５０４９０元）
組合累計收益表現： ＋４８﹒８％（本金１０５０００元計）（２０１６年８月開倉）
＊數據截至今日１１：００ａｍ
etnet榮獲HKEX Awards 2023 「最佳表現證券數據供應商」大獎► 了解詳情
