最近筆者一位朋友百無聊賴，雖然佢完全唔鍾意「煲劇」，但亦趕一趕潮流註冊ＮＥＴＦＬＩＸ，筆者亦受邀夾錢，一個帳號可以同時支援幾個登入，每個月只需要幾十蚊，入戲院買包爆谷唔小心加大已經無咗，區區幾十蚊已經有數之不盡嘅劇集比你慢慢睇，真係有十對眼睇到盲都睇唔完，近日更加有港劇加入ＮＥＴＦＬＩＸ，感覺上套戲可以上架已經係一種認同，呢種軟實力真係不容小覷。
筆者未有具體研究ＮＥＴＦＬＩＸ嘅財務資料，不過以互聯網平台作核心的業務當然是覆蓋愈多觀眾群愈好，邊際成本估計相差無幾，筆者朋友笑稱點解美國太空總署要派太空船出宇宙，就係要幫呢堆公司尋找外星人新客戶，否則當所有人都用ＩＰＨＯＮＥ，上ＡＭＡＺＯＮ買野既時候，未來邊到仲有爆炸性新購買力呢？情況就好似１６世紀大航海時代拓張市場咁。
睇得劇多，其實都有好處，以前睇美劇其中一種好鍾意拎來做題材就係政治同石油利益，每次男主角比人陷害或者追殺，必定係某日佢食飽飯行過唔小心見到類似利益團體既秘密，情況如同港產警匪片必定有一個或以上的臥底，筆者年青時已經植入呢種概念，今周沙特阿美由於需要公開發債而要披露財務資料，一睇之下引證了電影人既先見之明，雖然所有人都知道石油企業盈利必定十分可觀，但正式披露出來該公司盈利超過蘋果同谷歌總和，效果亦非常震撼，引證了電影夢工場從業員既聯想力十分之天馬行空。
＊本周策略＊
英鎊：早前建議於１﹒３０８０買入英鎊兌美元已成交，目標１﹒３３５０，止蝕１﹒２９００。
加元：本周建議候低於１﹒３２５０買入美元兌加元，目標１﹒３４５０，止蝕１﹒３１００。
《招商永隆銀行司庫 蕭啟洪》
WoW WoW星期三：健康網購產品低至$99 (只限今天)► 立即行動
