最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

12/06/2019 11:36

《古臣周記-古臣》魚缸牛熊線得而復失,上望空間仲有幾多?

  無幾耐之前花旗國威脅,如果墨西哥唔處理好移民問題,就會向佢嘅進口產品徵收關稅。啊!唔使一個星期,呢個危機就化解,雙方達成協議,墨西哥承諾採取措施阻止大量移民穿越美墨邊境,帶挈上星期本已「超賣」嘅香江魚缸嚟個急反彈,先後收復二萬七關口同十天、廿天線,連二百五十天線都收復埋。不過,魚缸今日已經再失二百五十天線,就咁睇反彈可以維持幾耐呢?或者有啲指標我哋都可以留意吓。

*中央對人幣保七嘅態度軟化,高盛料三個月後失守* 
  
  「孖屐」上有幾把聲音都講過,離岸人仔可以係一個指標去睇中美貿易戰之間傾成點。侵侵喺上任初期,一直批評過神州用人仔眨值手法,為自己喺貿易上帶來優勢。現時「孖屐」就聚焦人仔兌一美元可唔可以維持「七算」呢個水平。上星期五(7日)人行行長易綱接受《彭博》採訪就話人仔「無紅線」,即時被解讀為對人仔「保七」嘅態度軟化。最新高佬發表報告就話,人仔未來3個月可能會跌穿呢個關口,因為暫時嚟睇以貨幣貶值嚟抵銷關稅係最簡單嘅途徑。高佬預計人仔喺3個月、6個月同12個月後將分別達到1美元兌7﹒05、6﹒95及6﹒80。暫時離岸人仔兌一美元就報6﹒926,就咁睇暫時都叫穩陣啦?
  消息面上,花旗國同墨西哥傾成「刁」對環球經濟有好處,不過換個角度睇,之前有分析話神州可能因為花旗國同墨西哥嘅關稅爭議而得利,不過現時似乎無得再憧憬啦,加上侵侵最新又話如果習大大出席G20峰會唔同佢傾下,就會立即加徵關稅。阿臣諗,喺兩國元首見面之前,應該都會保持克制掛?或者缸友們,最好等到月底大阪G20峰會舉行後,先做重大嘅投資決定啦。

*南方東英推兩倍ETF,部署恒指二萬八關入十手*  
  
  魚缸現時由今個月低位26672升咗大約近700點,噚日(11日)收企二百五十天線(約27733),不過阿臣就覺得呢個只係早前跌到殘晒技術反彈,到二萬八呢個心理關口,可能就會回落,唔排除走返上年一浪低於一浪嘅形態。若是缸友對後市睇淡,或者到時就可以用住一啲衍生工具做部署。
  至於本身唔太熟悉衍生工具嘅缸友,都唔係無選擇嘅。南方東英繼之前推出1倍恒指反向ETF(07300)之後,再推出2倍槓桿恒指反向ETF(07500)。換言之恒指跌1巴仙,呢隻反向ETF就升2巴仙。推出呢隻ETF嘅南方東英就話,1倍逆向ETF持有嘅時間一般建議係兩星期到兩個月,而2倍ETF持有時間建議最好更短。遇到「牛皮市」嘅時候,更應該即斬唔好坐,所以如果缸友希望買入,就要預算嚟緊會係跌市定係上落市,從而考慮注碼。阿臣諗現時魚缸二萬八形成咗一個幾大嘅成交量密集區,再上嘅空間唔大,所以阿臣會喺恒指上到二萬八嘅時候先入十手,之後再作打算。
  講埋倉入邊兩隻魚毛金界(03918)同渣打(02888),兩者都升破咗一啲阻力位。金界之前喺9銀邊浮浮沉沉,星期一(10日)一支陽燭上之後似乎會有另一波升勢。渣打回購多時,股價終於有少少起色,技術上走出咗由五月築起嘅「三角形」走勢,所以策略繼續照舊坐到中期業績公布。

  表列截至6月12日(11:00am止)投資組合表現:
 
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     9﹒06元   36240元
  渣打      250股  67﹒50元    68﹒80元   17200元
  ----------------------------------------
  股票市值    : 53440元
  剩餘現金    : 93173元
  組合淨值    :146613元
  組合本月收益表現:+ 0﹒40%(截至上月底止組合淨值:146028元)
  組合累計收益表現:+39﹒63%(本金105000元計)(2016年8月開倉)
 
  *數據截至今日11:00am

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力