特朗普成日講到自己好把炮，左兜右兜，最終咪又係要同習近平會面！但此人向來衰口賤，對住傳媒就話中方極希望達成貿易協議，實情係人都知，佢唔搞掂自己發動嘅美、中貿易戰，明年大選共和黨就會食番特朗普種嘅惡果，所以我早就睇死佢唔會對３２５０億美元中國進口貨加徵２５％關稅，因為呢個係損人不利己嘅行動。不過，我真係好想知道，究竟「全面打」係咪真係對美國經濟冇負面影響，除非佢想逼聯儲局減息。
＊歐央行或再推寬鬆措施＊
周二（１８日）歐洲央行（ＥＣＢ）行長德拉吉在布魯塞爾的歐盟委員會會議發表講話，他指出ＥＣＢ可以再減息或進一步購買資產以令通脹達標。歐元區５月份通脹率降至１﹒２％，遠低於４月份的１﹒７％。近期較為悠閒嘅特朗普就即刻指責德拉吉壓低歐元匯價去刺激經濟，特朗普係咪精神分裂？佢咪又係光天化日之下干預聯儲局嘅貨幣政策！呢啲係咪叫做「只許美國減息，不許別國寬鬆」？現時外圍局勢轉差，尤其美、中貿易戰可能升級，就算Ｇ２０有習特會，都唔會即時解決所有問題，極其量只會達成部分協議。可以肯定特朗普係有個時間表何時完成甚麼政策，萬一未能１００％達標，亦會想辦法降低負面影響。
個人睇法，特朗普必須繼續極右政策，否則明年大選左右不討好，共和黨輸硬！不過，極右政策都係做個樣而已。根據阿特蘭大聯邦儲備銀行在今年２月發表的報告，若然美國向所有中國進口貨徵收２５％關稅，將令美國消費者物價指數上升０﹒３個百分點，而投資成本亦會上升１個百分點。《南華早報》在今年２月亦有分析指，美、中貿易戰令歐盟受惠，估計令其從中國方面奪得５００億美元的貿易額，而從美國方面亦多得２００億美元貿易額。條數點計，我諗只有特朗普先知！
＊聯儲局９月減息機會較高＊
聯儲局明日（２０日）凌晨公布議息結果，可以肯定會維持利率不變，我相信聯儲局主席鮑威爾在新聞發布會上，亦會強調美、中貿易戰發展將會影響當局貨幣政策，並會提及近期美國公布的經濟數據偏差，通脹輕微放緩，但多數會強調長期通脹預期無大變動云云。故特朗普或會啟動對中國３２５０億美元進口貨加徵關稅，以逼使聯儲局減息。由於聯儲局的縮表措施將於９月底停止，故不排除當局在９月份同時宣布減息。
外匯市場方面，聯儲局今年內減息預期升溫，但另一邊廂，德拉吉表示ＥＣＢ可以再減息及購買資產；澳洲儲備銀行亦在議息聲明表示，未來傾向進一步減息；瑞士央行亦表明要壓低瑞郎的投資吸引力；英鎊則仍然受到硬脫歐支持者約翰遜可能繼任首相的影響，日本央行行長黑田東彥早前亦表示，若通脹放緩亦會進一步放寬貨幣政策。雖然近期所見，各主要貨幣表現各異，即使聯儲局傾向減息，但投資者仍應以中長期角度去判斷。
＊日圓短期１０５至１０８波動＊
美元兌瑞郎過去四年維持在０﹒９５４０至１﹒０３４０的８００點子內橫行，故料瑞郎這深度負息貨幣仍然偏弱；由於美國已非處於十年前的零息環境，避險資金可流入美債，令日圓這同樣是負利率的貨幣難以藉著避險因素而大升，短期上落區料為１０８﹒５５至１０５﹒５５；歐元兌美元失守１﹒１２，短期仍以６月份第一周的低位１﹒１１６０為關鍵支持，失守則有再度下試１﹒１０４０江恩正方形２７０度角的風險，短期料暫於１﹒１０４０至１﹒１３４０波動。由於澳洲央行再減息機會最高，澳元兌美元仍然傾向下試０﹒６６００。英鎊兌美元短期如可收高於１﹒２６０５，則可視為轉強訊號，上升目標為１﹒２７６３及１﹒３０２０。
《資深外匯評論員 鄭廣復》
＊微信號：ａ３９２７８７７８
WoW WoW星期三：健康網購產品低至$99 (只限今天)► 立即行動
