由於呢排香江無咩好消息,「孖屐」升完好快又回落,好多缸友趁有反彈就獲利走人,當中唔少人見個「孖屐」咁唔穩定,都會選擇買內需股避險,但依家魚缸氣氛咁差,阿臣就覺得就算買內需股都未必可以避到險,始終魚缸少咗咁多水,缸友要吃大茶飯不再有啦!不過,神州由於下星期二(10月1日)開始一連七日嘅黃金周,孖屐估阿爺喺國慶前後出政策嚟推動消費,尤其上禮拜阿爺就大力推動全民運動,故個別內需股可以趁黃金周博下反彈!
交銀最新就出咗份報告分析今個月16號至20號期間嘅行業股價表現,內需股就喺咁多行業之中領先,而當中體育用品嘅估值有上升,而其他行業包括服裝供應商、家電、奢侈品牌、餐館同零售商嘅估值都跌。
*阿爺推全民健身,361度值博率最高*
阿爺喺今個月初發布有關於推廣足球、籃球和排球嘅「體育強國建設綱要」之後,國務院月中又再發布關於促進全民健身,同體育消費推動體育產業高質量發展嘅意見,希望可以促進全民健身同體育消費,所以上星期體品股就成為城中大熱!
由於有政策幫助,體品股喺黃金周前後表現應該都唔會太差,而最龍頭嘅就數安踏體育(02020)同李寧(02331),不過阿臣就比較睇好361度(01361)。雖然佢近期中期業績喺同行裡面唔算勁,半年股東應佔溢利只喺按年升近10巴仙至3﹒67億銀人仔,不過佢股價平,而且息率喺龍頭之中最高,穩定之餘又可以博佢喺黃金周前後一星期有炒作。技術圖上面睇,20天線升破250天線,而佢嘅保歷加通道頂部同底部有上移跡象,短期或可升到一年前高位2﹒11銀。
*看好內需新經濟股,美團仍有突破空間*
另外,除咗要跟住阿爺步伐走之外,阿臣認為有D內需帶動嘅新經濟股,都會因為黃金周而造好,其中,最睇好美團點評(03690),因為美團除咗外賣之外,佢旗下嘅大眾點評今年年頭都有其他搞作,當中有「必系列」排行榜,好似「必吃榜」、「必逛榜」同「必住榜」等等,佢哋羅列哂飲食住行四大方面嘅出遊需求,非常方便鐘意旅行嘅缸友,而且仲慳返唔少搵資料時間,正正啱哂下星期要出去玩嘅神州缸友。當用戶睇開「必系列」,自然就會一條龍用埋美團嚟預訂酒店同其他套票。
高盛最新有報告指,美團喺上市一年後,已經喺神州鞏固咗市埸領先嘅地位,預計2022年仲會賺多達340億人仔。高盛指,美團網上滲透空間大,相信美團會有增長前景,畀佢「買入」投資評級,目標價上調至97﹒5銀。
美團今日(25日)先破完頂嚟高見79﹒55銀,但佢RSI雖然近70,但氣勢仍盛,高處未算高,預料佢喺黃金周後一周都仲有得發力。
謂返阿臣個倉,阿臣噚日喺1﹒7銀入咝10000股361度,博佢短期反彈!而金礦股方面,暫時不買住,古臣唔想同一時間揸咁多貨。
表列截至9月25日(11:25am止)阿臣投資組合表現:
股份 股數 平均買入價 現價 總值
----------------------------------------
港股:
361度 10000股 1﹒70元 1﹒71元 17100元
金界 2000股 9﹒65元 12﹒10元 24200元
煤氣 1000股 16﹒00元 15﹒38元 15380元
----------------------------------------
股票市值 : 56680元
剩餘現金 : 103105元
組合淨值 : 159785元
組合本月收益表現: +1﹒6%(截至上月底止組合淨值:157318元)
組合累計收益表現: +52﹒2%(本金105000元計)(2016年8月開倉)
*數據截至今日11:25am
etnet榮獲HKEX Awards 2023 「最佳表現證券數據供應商」大獎► 了解詳情