相信各位缸友永遠都唔會忘記２０２０年嘅愚人節，因為喺呢日大象匯控（００００５）宣布取消派發第四次股息，當日股價就失守４０銀，仲令眾人傷透心。大象嘅派息紀錄長達廿幾年，因為佢派息夠穩陣，唔少缸友就算睇住佢由十幾年前１３０銀嘅高位跌落嚟都唔放。但係突然話唔派息，咁大象仲應唔應該揸？想換馬收息，又有邊條魚毛可以選擇？
＊大象情意結係時候放低？＊
雖然大象唔派息，但係有唔少缸友對佢出年恢復派息充滿信心，所以大象真係值得撈？的確，如果大象保持到之前嘅派息，係低價買入係好吸引。但係，要留意一間公司嘅派息幾多同佢嘅盈利能力有關，如果佢盈利少咗，但照樣派咁多息，反而會影響整間公司現金流同企業價值，亦會係公司股價反映，分分鐘仲會「賺息蝕價」。從大象上年嘅全年業績就可以睇到，佢嘅盈利能力正下降，另外係業績大會上仲話打算用三年時間進行重組，喺全球裁員３﹒５萬人，一間銀行嘅未來計劃唔係諗點樣賺多Ｄ，反而係點樣節流，可見盈利能力提高有限。近日細摩報告就表示，由於新冠疫情導致全球經濟存在不明朗，且花旗國減息，會令大象收入前景受壓，因此，下調大象今明兩年每股盈利各４７巴仙及１６巴仙。
＊中銀香江或可作為取代品＊
自從大象講話取消派息，以中銀香江（０２３８８）為例嘅本地銀行股就被追捧。中銀香江對於派息政策是否改變亦都表示，目前沒有更改政策嘅計劃，而且都會以股東回報、監管及長期業務發展需求作為考慮前提，認為現時四成至六成嘅派息區係合理嘅。銀行股歷來就係派息穩定嘅代表，上年中銀香江派末期息０﹒９９２銀，全年合共派１﹒５３７銀，派息比率達五成，較上年度增加近半成。如果按現價水平，目前息率都有６厘幾，的確係幾吸引。
但係除咗息率外，都要考慮公司整體嘅業務前景。中銀香江同大象相比業務範圍就比較單一，佢嘅業務專注係香江。但係近年來環球經濟環境開始轉差，以大象為例上年歐洲地區虧損就擴大逾４倍，再加上新冠疫情係歐洲地區爆發，多個國家接近進入停擺狀態，亦未知經歷今次災難要幾耐先可以恢復。因此，中銀香江係依個時候就有業務優勢，雖然香江環境都唔好得去邊，但都可以話輸少當贏。另外，中銀香江仲有一個強大嘅後盾－－中行（０３９８８）加持，近年仲跟住阿媽發展一帶一路，開拓東南亞市場，相信前景唔會差得去邊。不過，中銀香江同其他本地銀行一樣都受到全球低息環境衝擊，係中短期對其經營環境相當不利，所以要換馬到銀行股要留意。
＊５Ｇ時代，香江電訊看好＊
除咗銀行股，收入穩陣且不受經濟周期影響嘅電訊股都係一個唔錯嘅選擇，當中阿臣就比較睇好香江電訊（０６８２３）。香江電訊去年派末期息４０﹒３７仙，全年總分派為７０﹒３８仙，派息比率高達１０２巴仙，而２０１８年派息比率更有１０７巴仙。原來香江電訊維持依個高派息比率已經超過八年，相信佢手上嘅資金流十分強勁，不然點會派息派得咁大方。而且公司都好注重資金流，其管理層表示，未來會維持資本開支佔銷售收入不超過１０巴仙比率。按現價計，香江電訊息率都有近６厘。
近日瑞信係研究報告就話，本地電訊業至２０１８年１０月價格競爭方面有轉正面，而且電訊服務並無點受到上年香江社會活動影響，但因疫情影響輕微下調香江電訊目標價２％至１４銀，惟維持「跑贏大市」評級。另外，孖屐都普遍預計今明年將會進入全面５Ｇ時代，而香港電訊由４月初就推出５Ｇ商用服務，隨著５Ｇ嘅普及會越來越多人由４Ｇ網路轉５Ｇ網路，相信ＡＲＰＵ（每戶平均收入）會上升，有利公司盈利。
＊香江電訊升太急待回調買＊
不過，近期因疫情及大象零息影響香江電訊從上個月２３日９﹒３９銀低位，一下子飆升到現價接近１２銀位置，累計升幅逾２８巴仙，不宜高追。待其回調，補上本月２日嘅上升裂口（約１０﹒７至１０﹒８４銀）再作部署。
阿臣個倉暫時按兵不動。
表列本地銀行及電訊股息率比較：
股份 現價（升跌幅％） 息率 預期息率
（％） （％）
－－－－－－－－－－－－－－－－－－－－－－－－－－－－－－－－－－－－－－－－－
銀行股：
恒生銀行（０００１１） １３７﹒００元（－０﹒２９） ５﹒９８１ ５﹒９８５
東亞銀行（０００２３） １６﹒６０元（＋０﹒１２） ２﹒７７１ ４﹒０５４
創興銀行（０１１１１） １０﹒４０元（ 無升跌） ５﹒５７７ Ｎ／Ａ
中銀香港（０２３８８） ２３﹒８０元（ 無升跌） ６﹒４５８ ５﹒９５４
大新銀行（０２３５６） ７﹒１３元（＋１﹒５７） ６﹒７３２ ４﹒５１０
本地電訊股：
和記電訊（００２１５） １﹒３３元（－０﹒７５） ４﹒９８５ ３﹒７３１
數碼通 （００３１５） ５﹒０５元（－０﹒７９） ７﹒０３０ ７﹒３２７
香港寬頻（０１３１０） １２﹒８４元（－０﹒９３） ５﹒４５２ ５﹒９９５
香港電訊（０６８２３） １１﹒７８元（－１﹒１７） ５﹒９７４ ６﹒１９７
－－－－－－－－－－－－－－－－－－－－－－－－－－－－－－－－－－－－－－－－
註：資料截至今日１１：１５ａｍ
表列截至４月７日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２００﹒００ １２０００
平安好醫生 ５００股 ５２﹒９０ ８６﹒０５ ４３０２５
阿里巴巴 １００股 １７６﹒００ １８９﹒９０ １８９９０
微盟集團 ２０００股 ４﹒５５ ５﹒０３ １００６０
三一國際 ２０００股 ４﹒１１ ４﹒０４ ８０８０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９２１５５元
剩餘現金 ： ９７７５７元
組合淨值 ： １８９９１２元
組合本月收益表現： ＋ ４﹒４％（截至上月底止組合淨值：１８１９８７元）
組合累計收益表現： ＋８０﹒９％（本金１０５０００元計）（２０１６年８月開倉）
＊數據截至今日上午１１：１５ａｍ
etnet榮獲HKEX Awards 2023 「最佳表現證券數據供應商」大獎► 了解詳情
