不知不覺距離花旗國孖屐經歷十日四次熔斷嘅驚恐場面已經過去大半個月，而花旗國道指亦都由３月２３日嘅低位１８２１３點反彈超過兩成，進入技術性牛市，唔通已結束史上最短嘅熊市？同時，香江呢邊亦由３月１９日低位反彈一成半。不過，有唔少分析指，香江呢次反彈都只係熊市嘅第二階段，到時企業盈利同前景嘅問題逐步浮現，今次彈完仲會再大跌；亦又人話目前孖屐已經處於非常悲觀嘅熊市第三階段。究竟咩係熊一、熊二同熊三？香江孖屐又處於一個咩階段呢？
＊牛三資產泡沫風險極高，一觸即破＊
一般來講，股指趨勢向上，累積升幅達到兩成以上就係「牛市」；相反股指趨勢向下，又跌超過兩成就係「熊市」。具體細分嘅話，牛市同熊市亦有一期、二期同三期之分。牛市第一期喺啱啱經歷完熊市，當時投資者對於之前熊市嘅經驗仍然非常深刻，加上當時主流意見都仍然唱淡前景，所以投資者未敢大手部署。不過由於經歷孖屐大跌之後，股票價值逐漸顯現，所以吸引部分長線嘅價值投資者入市。
同時，由於投資者當時手頭上嘅組合變得相對保守或股票比例大減，所以孖屐再大跌嘅機會唔大。當愈來愈多人留意到孖屐嘅升浪，並且企業盈利同經濟數據都開始有增長，就意味進入牛市第二期。相比起「牛一」，「牛二」會持續比較長嘅時間，但如果企業盈利增長未如預期，過程中會出現回吐壓力，但總體而言經濟環境都改善緊。到企業業績同投資者熱切嘅情緒吻合，孖屐嘅氣氛同睇法就會變得樂觀，慢慢推高估值，增加形成資產泡沫嘅風險，咁就意味已進入「牛三」。
＊熊二假反彈吸引投資者重新入市＊
但當一個比較影響經濟嘅消息一出，呢個泡沫就會爆破，急跌下引發熊市嘅出現。熊市一期嘅特徵就係喺好短時間之內出現明顯嘅大急跌，價值投資者紛紛沽出手頭上嘅貨，令呢個階段嘅跌幅可以係之前牛市累積升幅嘅三分之一，甚至係一半。然後緊接出現嘅係「熊二」，過程中會出現一定程度反彈，可能會因此吸引投資者入市，不過同「牛二」相反，企業盈利出現倒退，甚至蝕錢，拖累魚缸走勢呈現一浪低於一浪。最終孖屐氣氛持續冷淡悲觀，進入股票估值低殘嘅「熊三」階段，但同時亦正正醞釀緊下一次牛市嘅出現。
＊魚缸跌勢始於２０１８年貿易戰開打＊
聽到呢度，相信大家都好好奇香江呢邊究竟係處於邊個階段。阿臣認為，今次大型跌浪係由２０１８年開始，喺年初１月見過３３４８４點嘅歷史新高之後，中美亦喺貿易問題上出現磨擦，繼而喺３月開始打關稅戰。貿易戰拖累兩國經濟，再加上被全球經濟增長放緩嘅陰霾籠罩，香江魚缸由當年１月高位至２０１８年１０月嘅低位就累跌咗二成七。之後２０１９年孖屐走勢隨著兩國貿易戰同談判嘅消息反覆上試至３萬點樓上。不過，今年新冠疫情向全球蔓延同石油戰兩隻黑天鵝連環打擊，魚缸最多直插兩成七。
如果以２０１８年起為魚缸進入「熊一」，之後一年嘅反彈為「熊二」嘅假反彈時期，咁魚缸喺上月急跌就已經正式進入「熊三」。而「熊三」一般比「熊一」錄得更大跌幅，即係魚缸仍有機會跌得更深，所以呢轉反彈可能仍未真正見底。不過，今次環球股災都緣於花旗國孖屐多次急跌，因為神州疫情已經喺３月股災前初步回穩，所以香江孖屐走勢仍要留意住花旗國以及未來幾個月嘅經濟數據同企業盈利表現。
＊香江後市還要視乎花旗國孖屐走勢＊
有分析指，歷史上多次由經濟衰退導致嘅熊市都唔會大跌超過三成，更多是因為投資者對孖屐失去信心，例如上世紀２０年代嘅大蕭條係因為民眾對錢莊佬盲目投資而對金融體系失去信心，因而出現恐慌性擠提；２００８年金融海嘯係因為次按危機令投資者對金融孖屐失信心，再恐慌性出貨。而今次股災就係對特朗普政府處理疫情投下不信任嘅一票，所以，如果全球疫情喺短期內受控，挽回孖屐信心，魚缸可能就步出熊市。
＊古臣倉本周按兵不動＊
近日孖屐從低位反彈不少，但阿臣對未來經濟前景都唔敢睇得太樂觀，因為即使疫情得到紓緩，今年頭半年恐怕都會出現明顯嘅業務及供應鏈中斷，但有全球大放水嘅支持下，短期再急跌嘅機會暫時唔大。所以，阿臣打算等孖屐回吐時再部署下一輪入貨，今個星期倉內股票按兵不動。另外，阿臣倉內嘅平安好醫生（０１８３３）近日急升，３月低位反彈左超過六成，而阿臣持貨至今股價都累升左七成半，所以打算趁再升到１００蚊邊時減一減磅，到回落時再部署。
表列港股重要事件時間表：
年份 事件 期內股市高低位表現
－－－－－－－－－－－－－－－－－－－－－－－－－－－－－－－－－－－－－
１９９７年－１９９８年 亞洲金融風暴、港元受狙擊 跌６１％
２０００年－２００３年 科網股泡沫爆破 跌５５％
２００７年８至１０月 港股直通車 升４９％
２００７年－２００８年 美國次按危機、金融海嘯 跌６７％
２０１１年 歐債危機 跌３５％
２０１５年－２０１６年 Ａ股股災 跌３６％
２０１８年 中美貿易戰 跌２７％
２０２０年年初 疫情、石油戰觸發環球股災 跌２７％
－－－－－－－－－－－－－－－－－－－－－－－－－－－－－－－－－－－－－
表列截至４月１５日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
ＳＰＤＲ金ＥＴＦ １０股 １０９７﹒００ １２５５﹒００ １２５５０
平安好醫生 ５００股 ５２﹒９０ ９３﹒２０ ４６６００
阿里巴巴 １００股 １７６﹒００ ２００﹒２０ ２００２０
微盟集團 ２０００股 ４﹒５５ ５﹒３９ １０７８０
三一國際 ２０００股 ４﹒１１ ４﹒３６ ８７２０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９８６７０元
剩餘現金 ： ９７７５７元
組合淨值 ： １９６４２７元
組合本月收益表現： ＋ ７﹒９％（截至上月底止組合淨值：１８１９８７元）
組合累計收益表現： ＋８７﹒１％（本金１０５０００元計）（２０１６年８月開倉）
＊數據截至今日上午１１：１５ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
