近日神州火鍋龍頭海底撈(06862)公布中期成績表,喺今年嘅新冠疫情底下,上半年盈轉虧近十億人仔,不過符合之前盈利警告。但係海底撈嘅股價並沒有受此影響,仲獲得大量資金追捧,接連創出上市新高,最新總市值超過2700億銀,而其他火鍋佬都同樣走高。究竟中期大虧嘅火鍋龍頭憑甚麼破頂?「孖屐」究竟看上甚麼?火鍋佬下半年又值唔值得部署?
*火鍋文化為行業添底氣*
火鍋文化可以話係神州特有嘅傳統飲食文化,時至今日火鍋仍然受到神州年輕人嘅喜愛,尤其係「90後」。對於年輕人來講,吃火鍋並唔係單純嘅一餐飯,更多嘅係一種社交活動嘅方式。據《火鍋行業研究及消費者調研報告》顯示,火鍋消費群體超過五成都係「90後」,而消費人群中有超六成人每月可支配收入約為三千至一萬人仔。另外,過半消費者外出就餐有一至三成機會選擇火鍋,且以中高檔火鍋居多。加上,火鍋有明顯嘅季節性屬性,相信在疫情過後嘅下半年,火鍋消費會迎來一輪旺季。
《報告》顯示,神州餐飲「孖屐」正以每年一成嘅年增長穩健發展,而火鍋係當中增速超過其他品類及行業平均增速。目前,神州火鍋行業「孖屐」規模約五千億人仔,預計到2022年規模會達到八千億人仔。而且火鍋因門檻低、利潤高嘅特點不斷吸引投資者入場,火鍋每平米營收2﹒63萬人仔,平均淨利率近12巴仙。儘管如此,火鍋行業的分布仍然較分散,現時主要有打中高端嘅海底撈,定位大眾市場嘅呷哺呷哺(00520)等,但2018年火鍋行業CR5(行業集中率)僅約7巴仙。另外,火鍋行業集中於一二線城市,未來還會向三四線城市發展嘅巨大空間。
*海底撈業務擴張速度快*
作為品牌排名始終喺火鍋類前十大嘅海底撈,中期成績表完全反映了上半年新冠疫情對餐飲業嘅衝擊,自1月26日起自願暫停神州所有門店的營業到3月份先陸續重開,海底撈上半年收入97﹒6億人仔,同比下降17巴仙,平均翻檯率每天3﹒3次。雖然疫情下被迫停業,但海底撈擴張嘅心似乎未受影響。上半年新開173家餐廳,截至今年中期,海底撈全球門店數量達到935家。不過,從佢過往嘅成績表睇,門店收入始終係佢最重要嘅收入來源,中期餐廳收入就佔左公司總收入嘅94巴仙,所以佢瘋狂擴張嘅背後有利於進一步增加收入。中金就喺報告就話,海底撈擴張速度快過預期,預計7月及8月分別開設40到50家餐廳,考慮到簽約餐廳數量及疫情期間更多獲得優質點位機會,估計全年公司淨開店數量或超之前300家嘅目標。
*自熱火鍋迎來爆發期*
講到海底撈就唔可以唔提同佢拍住上嘅頤海國際(01579),不過頤海屬於火鍋產業鏈嘅中游,主要向海底撈提供火鍋調料。因為餐飲行業嘅發展,調料企業潛力大、增長高,調料「孖屐」2013至2018年CAGR(複合年均增長率)達15巴仙。頤海國際憑借海底撈嘅影響近年來迅速發展,佢今年中期成績嘅表現都好過預期,半年純利按年增長48巴仙至3﹒99億人仔。市值超過1300億銀,是神州調味品行業第二大市值公司。
除咗為海底撈提供火鍋調料,頤海自2017年就推出自熱火鍋,減少對海底撈嘅依賴性,抗風險能力都加強。因自熱火鍋方便快捷,口味多樣,能適應更多場景,面世後就獲得「孖屐」嘅喜愛。自2017年到今,自熱火鍋「孖屐」規模增速達4﹒5倍,而頤海中期自熱火鍋都錄得九成六嘅強勁增長。機構預料,隨自熱火鍋不斷推廣,「孖屐」規模將由2019年55億人仔擴大到2020年70億人仔。
*看好火鍋股下半年表現,待回調吸納*
總體來睇,進入下半年因神州疫情已受控,而秋冬季節又係火鍋嘅旺季,加上海底撈上半年積極擴張,料下半年佢嘅平均翻檯率同顧客人均消費都會有所提升;而頤海背靠海底撈擴張門店,自身有自熱火鍋嘅普及,收入年複合增長會亦會繼續以雙位數增長。阿臣中長線係比較睇好兩者。不過自公布業績後,兩股就不斷破頂,料短期會有回調壓力,待股價回落到十天線附近(海底撈約47﹒42銀,頤海國際約114﹒51銀)再考慮吸納。
另外,因三一國際(00631)目前基本面偏弱,加上與其他重卡比較偏落後,阿臣趁佢近排反彈,於4﹒33銀全數沽,賺326銀(已扣手續費)。
表列截至9月2日早上11時15分阿臣投資組合表現:
股份 股數 平均買入價(元) 現價(元) 總值(元)
---------------------------------------
港股:
SPDR金ETF 10股 1097﹒00 1429﹒50 14295
平安好醫生 200股 52﹒90 116﹒00 23200
阿里巴巴 200股 210﹒50 288﹒40 57680
港交所 100股 264﹒50 393﹒40 39340
---------------------------------------
股票市值 : 134515元
凍結資金 : 21717元
剩餘現金 : 87152元
組合淨值 : 243384元
組合本月收益表現: + 0﹒9%(截至上月底止組合淨值:241112元)
組合累計收益表現: +131﹒8%(本金105000元計)(2016年8月開倉)
*數據截至9月2日早上11時15分
全新節目《說說心理話》青少年不可以戀愛!?真實個案講述驚心動魄經歷► 即睇