最新評論  |  
國金點評  |  
中國點評  |  
港股點評  |  
期貨/商品  |  
窩輪/牛熊證  |  
ETF  |  
外匯  |  
基金  |  
強積金  |  
地產  |  
圈中人語  |  
最愛專欄

加入最愛專欄

作者為資深投資者。

10/03/2021 11:38

《古臣周記-古臣》債息作怪資金輪動,內銀穩陣攻守兼備

  近期舊經濟股再獲資金青睞,美國債息走高下資金追入舊經濟股,內銀股更加係孖屐焦點,懶理大市調整逆市抽高,取代科網龍頭成為升市火車頭,亦為資金避風港。阿臣認為此時不論轉倉加倉內銀股亦為首選,一來,科技股調整未完;二來,兩會幣策同「保六」增長都利好內銀表現;三來,不良貸款問題已逐步解決。

*美債息抽高吸引資金換馬*

  除去政策同復甦因素,今次神州金融股發威主要由於大型資金換馬。睇返數據,恒生科指由2月18日觸及歷史高位後開始不斷回調,到本周一(8日)已經累計急回兩成五,步入技術熊市。今次科技股調整受累於美國十年長債收益率攀升,近日高見1﹒6厘,令孖屐可以趁機「殺估值」,而且將資金轉入相對落後嘅舊經濟股,從近日北水淨買入最多個股由QQ(00700)及美團(03690)易位至中移動(00941)及建行(00939)等舊經濟股就可得知。風水輪流轉,資金亦然,由於債息憂慮短期未能釋除,相信舊經濟股續當炒,正正內銀股較攻守兼備,息高而且盈利前景明確,加上美債息高企令金融板塊受惠於息差擴闊,帶動銀行股追落後,呢一排無輪想避險定跟風炒都係要揀內銀。

*神州利率支持內銀淨息差*

  國策方面,全國兩會於本月初揭幕,國務院總理李克強發表政府工作報告,提到今年貸幣政策需要「靈活精準、合理適度」,體現神州幣策不急轉彎,穩字當頭,且逐步退出寬鬆,人行踏入牛年後就持續收水,人行上月公布一年期LPR(貸款市場報價利率)連續第10個月持平,呼應人行近來釋放嘅政策穩定信號。利率方面,李克強總理話神州會改善對存款利率嘅監管,推動貸款利率進一步降低,反而銀保監主席郭樹清就放風話今年貸款利率有增加嘅可能性,大行瑞銀就認為喺通脹預期同政策利率提升嘅前提下,市場利率有可能上升,相信今年神州利率環境有利內銀淨息差。
  中金更加睇好今年內銀淨利潤增速係過去5年嚟最高,貸款定價升、信貸增量穩、信用成本高基數回落都利好內銀業績,仲留意到貸款定價同息差表現滯後於市場利率,遲下升返追落後都正常。
  另外,今年神州定好GDP增長目標係6巴仙以上,相比市場預期嚟講係非常保守,外界普遍認為必定超額完成,瑞銀首席中國經濟學家汪濤更加預期今年神州GDP增長有成8﹒2巴仙,全年出口或增一成以上,消費亦可能追落後升一成,貴為「百業之母」嘅銀行業固然受惠。

*壞帳風險逐漸放緩*

  不過,內銀壞帳情況仍不容忽視。政府要求內銀繼續讓利實體經濟,允許今年大型商業銀行普惠小微企業貸款增長三成以上,內銀面對的盈利壓力未有改變,如經濟增長可「超六」,銀行面對企業壞帳問題就會有所緩減。孖屐相信多項支持性政策會持續。預期神州以溫和步伐退出支持性政策嘅話,大型銀行資產質素會維持穩定。野村指,舊年第四季內銀嘅資產質素同資本充足率都得到改善,不良貸款率按季跌12個基點至1﹒84巴仙,不良貸款覆蓋率升5個百分點至184巴仙,資本充足率升29基點至14﹒7巴仙。
  此外,神州此前整頓互聯網貸款業務亦有助減緩內銀壞帳壓力,銀保監會發布《通知》,對互聯網貸款行業下「緊箍咒」,設置出資比率、集中度同限額管理共三條紅線,令網貸業務優勢不再,唔少貸款同存款資金重返內銀,神州1月新增人民幣貸款3﹒58萬億銀創新高就係好例子。

*靜待加倉良機*

  就咁睇近期撈內銀真係不二之選,但係成個板塊呢排升到破位破頂咁,缸友要入貨真係唔急於一時,阿臣下星期三同大家分析吓再決定揀邊隻內銀佬!
  之前阿臣提到,如果福萊特玻璃(06865)連續兩日收市都低於26銀就會止蝕離場,所以已經喺5號高位23﹒5銀放咗福萊特,扣埋手續費,總共套現23485銀,蝕咗9115銀。加埋倉位現金共有45539銀,留返之後再作部署。

  表列截至3月10日上午11時阿臣投資組合表現:
 
  股份        股數  平均買入價(元)    現價(元)  總值(元)       
  --------------------------------------
  港股:   
  港交所      100股   264﹒50  446﹒40元  44640
  九龍倉置業   2000股    32﹒00   44﹒50元  89000
  京東集團     100股   335﹒60  343﹒20元  34320
  中金公司    2000股    18﹒22   16﹒32元  32640
  世茂服務    1000股    13﹒50   13﹒54元  13540
  -------------------------------------- 
  股票市值    : 214140元 
  剩餘現金    :  45539元 
  組合淨值    : 259679元 
  組合本月收益表現: -6﹒6%(截至上月底止組合淨值:278064元)
  組合累計收益表現:+147﹒3%(本金105000元計)(2016年8月開倉)

  *數據截至3月10日上午11時

全新etnet健康網購,送你【健骨維他命D3(1000IU)】乙樽(價值$108)► 立即行動!

專家陣容
顯示更多
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力