《古臣雙周記－古臣》心通醫療（２１６０）憧憬核心產品銷售放量

　　魚缸呢期窄幅上落，悶到無朋友，不過醫療股呢期炒得咁燦爛，明顯見到有資金喺入面搞作。魚缸市底其實唔差，大型藍戰士唔炒唔緊要，最緊要中小型股有炒作！當中阿臣見到有一隻醫療器械股有爆發潛力，就喺心通醫療（０２１６０）。

＊ＴＡＶＩ發展潛力大屬醫療行業藍海＊

　　經導管主動脈瓣置換術（ＴＡＶＩ）於２００２年首次應用於臨床，技術原理係通過使用導向管植入人工主動脈瓣，技術估計未來十年將大幅應用喺主動脈瓣狹窄患者上，因為侵入性較細、手術風險低、創傷小、住院時間較短且恢復較快，喺臨床實踐中最受推薦嘅方法，估計ＴＡＶＩ手術普及性未來大增，成為醫療器械行業發展嘅其中一片藍海。
　　弗若斯特沙利文預計，２０１９至２０２５年神州市場將以５３﹒１巴仙嘅年複合增長率快速擴容，２０２５年市場規模有望達到５０﹒６億美金。所以，ＴＡＶＩ適應症喺神州未來大把機會大展拳腳。

＊心通醫療核心產品增長及質素具優勢＊

　　國產品牌方面，神州進入商業化階段嘅主要ＴＡＶＩ產品嘅品牌包括心通醫療、啟明醫療（０２５００）、傑成醫療、愛德華生命科學，當中以心通醫療及啟明醫療係神州品牌主要玩家，故主要以此兩品牌作比較。
　　心通醫療核心產品為ＶｉｔａＦｌｏｗ。雖然去年年頭開始受新冠疫情影響，相關手術量必然下降，但去年銷量仲可以有１２９３套，按年大增３﹒７７倍，反映行業對產品需求殷切及對品牌嘅信心，更可憧憬疫後積壓手術陸續進行，產品持續放量。惟啟明醫療較之放緩，去年其核心產品ＶｅｎｕｓＡ－Ｖａｌｖｅ收入約２﹒７２億人仔，僅升１７﹒２巴仙。
　　心通醫療產品質素領先同行。ＶｉｔａＦｌｏｗ喺目前商業化ＴＡＶＩ產品裡唯一一款具有電動輸送系統嘅產品，從而提高手術成功率嘅亦有助於減少醫生嘅學習時間。另外，ＶｉｔａＦｌｏｗ亦係神州上市產品中首款使用牛心包作為瓣膜組織嘅產品。牛心包好處喺減少血流造成嘅瓣損壞，而牛心包佔有全球ＴＡＶＩ市場５５巴仙以上嘅份額，以及全球幾乎全部外科主動脈瓣膜置換術（ＳＡＶＲ）市場，居於主導地位。價錢方面，去年公司ＶｉｔａＦｌｏｗ平均售價為８萬銀（人仔．下同）左右，較啟明醫療嘅１９﹒６萬銀便宜。
　　根據弗若斯特沙利文報告，臨床試驗方面，ＶｉｔａＦｌｏｗ喺全因死亡率及術後併發症（包括中度／重度瓣周漏、嚴重卒中和血管併發症）方面表現極出色，例如全因死亡率在出院時和植入後在３０天死亡率僅０﹒９％；１年及２年死亡率分別為２﹒７０％及４﹒５０％，數據目前為國內已商業化產品同類最佳。故此，阿臣認為公司嘅產品目前在國內喺最具競爭力，性能最卓越。
　　假設ＶｉｔａＦｌｏｗＩＩ今年順利獲批商業化，出廠價仿照前一代ＶｉｔａＦｌｏｗ約８萬銀定價，加上明年於歐洲成功獲批商業化，料公司毛利率隨銷售規模擴大增，甚至加快公司虧轉盈速度。

＊擁有母公司微創醫療銷售優勢＊

　　心通醫療具備強大母公司優勢，其為微創醫療（００８５３）子公司，微創為國內最大綜合性醫療器械創新企業，銷售管道豐富，海內外超過８０個國家和地區銷售，全球覆蓋醫院超過一萬家。產品可透過母公司嘅銷售管道於海外發展。
　　近期醫療器械股普遍由大牛股變身為大熊股，全因神州集採政策拖累，但大家唔使憂心住，因為ＴＡＶＩ行業尚處於萌芽階段，加上屬創新器材，估計神州當局會繼續重點扶持發展，短期盈利估計較少機會被政策拖低，預期可以繼續跑贏大市。

＊高增長股不宜只參考估值買賣＊

　　根據彭博綜合預測，２０２１至２０２４年收入分別為３﹒０６億、６﹒１億、９﹒３２億及１３﹒８５億。２０２１至２０２４年盈虧分別為－７６３３萬、８１３０萬、２﹒０４億、３﹒４億。以噚日（２７日）收市價１６﹒７４銀計算，２０２２年市盈率約４００倍，估值確實較高。惟買入創新醫療器械公司，大家主要聚焦其潛在增長速度、產品放量情況，加上憧憬產品市佔率大增，故此估值現時並非買入嘅主要參考要素，建議以中長線投資為目標。
　　以技術圖表去望，建議調整至１６銀可吸納，目標價先望前頂約２１銀，惟連續兩日收穿１４銀止蝕。
　　目前阿臣個倉維持不變，有賺有輸，心通醫療到價先買！


　　表列截至４月２８日中午１２時阿臣投資組合表現：
　
　　股份　　　　　　　　股數　　平均買入價（元）　　　　現價（元）　　總值（元）　　　　　　　
　　－－－－－－－－－－－－－－－－－－－－－－－－－－－－－－－－－－－－－－
　　港股：　　　
　　港交所　　　　　　１００股　　　２６４﹒５０　　４９４﹒４０元　　４９４４０
　　九龍倉置業　　　２０００股　　　　３２﹒００　　　４５﹒１５元　　９０３００
　　京東集團　　　　　１００股　　　３３５﹒６０　　３０８﹒６０元　　３０８６０
　　中金公司　　　　２０００股　　　　１８﹒２２　　　１９﹒３０元　　３８６００
　　郵儲行　　　　　２０００股　　　　　６﹒１０　　　　５﹒１７元　　１０３４０
　　融創中國　　　　１０００股　　　　３２﹒８０　　　３０﹒５５元　　３０５５０
　　－－－－－－－－－－－－－－－－－－－－－－－－－－－－－－－－－－－－－－　
　　股票市值　　　　：　２５００９０元　
　　剩餘現金　　　　：　　１７４５９元　
　　組合淨值　　　　：　２６７５４９元　
　　組合本月收益表現：　＋０﹒９％（截至上月底止組合淨值：２６５１４９元）
　　組合累計收益表現：＋１５４﹒８％（本金１０５０００元計）（２０１６年８月開倉）

　　＊數據截至４月２８日中午１２時