《古臣周記》上年12月上市嘅美圖(01357),開發神級P圖工具,幫你美白亦得,
幫你極速瘦身,亦得,簡直係令人「不誠實使用電腦」嘅神器。呢隻神器上市未夠半年,最近就
連連破頂,短短幾個月就由魚毛變魚王。美圖喺星期一(20日)時亦表演咗一場極速瘦身之旅
,喺股價見23﹒05銀新高之後,廿分但鐘之內就倒跌,收市仲倒插11巴仙,相信摸咗頂嘅
缸友大有人在,證明「美貌」同「新高」,都係虛幻得很嘅事情,曇花一現過後就甚麼都沒有啦
。
*股價坐過山車,主席心情亦受掀動*
古臣星期二(21日)查閱報道,原來公司公眾持股量得5﹒7億股,佔公司已發行股本
13﹒6巴仙,而主席蔡文勝、行政總裁吳澤源就分別持有26﹒02巴仙同13﹒4巴仙,蔡
文勝個仔就持有7﹒1巴仙,三者因為係主要股東嘅關係,有禁售期限制,上市後頭6個月內不
得減持。至於首次公開發售前機構投資者就一共佔有39﹒9巴仙股權,同設6個月禁售期。相
信所有股份都一樣,公眾持股量一偏少,股票就更好炒,難怪證監早前就咁關注創業板圍飛啦!
美圖由3月3日起,到上星期五(17日)11個交易日內漲起八成,以月計直頭亦升近八
成,而星期一就見埋歷史新高,最高峰市值去到974﹒3億銀。創辦人蔡文勝當日心情亦同股
價一樣坐過山車,初時喺微信朋友圈度仲話帶領其他科技公司大漲,到收市時股價大插後就話心
情平常,多謝大家關心。
*美圖=700+APPLE?*
美圖聲稱自己公司坐擁11億用戶,但其實九成收入係來自賣手機,上月發布美圖T8就炒
到過萬蚊人仔一部,公司又話未來主要收入來源將在於電商及廣告,有信心今年內達到收支平衡
。
早喺美圖蠢蠢欲動嘅時候,古臣喺啲炒股whatsapp群組當中,就經常聽到人將美圖
比喻為「騰訊(00700)+蘋果公司(APPLE)」,然後極睇好咁話。不過依古臣睇,
現時作呢種定論未免言之尚早。因為美圖係自納入南下港股通買賣名單後先爆上,北水「水喉」
係一大主因,至於呢條水喉幾時關就唔知啦,一關的話股價就失去一個上升因素。
有玩美股嘅Philip亦都同古臣講,Twitter都坐擁逾3億用戶,但就蝕足11
年,而騰訊2004年上市時已經取得盈利,又錄得增長,同美圖上市時,2013到2015
年三年勁蝕62億人仔嘅情形唔同。美圖能否同騰訊相提並論,就真係要頗長時間先證明到啦!
魚缸勢頭仲係唔錯,不過唔少股份由於升得太多,走勢都變得波動咗,仲有6日先至期指結
算,古臣只好以不變應萬變啦!
表列截至3月22日止投資組合表現:
股份 股數 買入價 現價 總值
----------------------------------------
金隅 10000股 3﹒02元 3﹒61元 36100元
匯控 400股 63﹒00元 62﹒95元 25180元
----------------------------------------
股票市值 :61280元
剩餘現金 :10648元
組合淨值 :71928元
組合本周收益表現:- 4﹒0%
組合本月收益表現:- 0﹒4%(截至上月底止組合淨值:72194元)
組合累計收益表現:+10﹒7%(本金65000元)
*數據截至今日11:30am
etnet榮獲HKEX Awards 2023 「最佳表現證券數據供應商」大獎► 了解詳情