《小傳日記》ＱＱ破頂停不了，魚缸高飛好友笑！

　　《小傳日記》法國總統中間派候選人馬克龍先拔頭籌，加埋好大機會贏埋第二輪投票，「脫
歐」憂慮已經大減，花旗魚缸噚晚（２４日）開心飛起２１６點或１﹒１巴仙，收報２０７６３
，讚！
　　「脫歐」陰霾急降，香江魚缸今朝（２５日）跟外圍高開６５點後就扶搖直上，就連傳出北
韓進行實彈演習都無有怕，最緊要係股王ＱＱ（００７００）屢創新高，缸友睇到嘩嘩聲，成功
推動恆指全日最高位收市，報２４４５５點急漲３１６點；國指有金融股撐腰，跳起１６４點收
１０２７２。
　　魚缸氣氛突然轉晴，缸友放膽買貨，成交急增逾１７巴仙至７６９億銀左右。　　

＊馬克龍報捷環球市興奮，大象在跳舞ＱＱ靚到暈＊

　　ＱＱ再破頂彷彿已經唔喺咩新鮮事，連續第四日破頂，最新已經去到２４２﹒８銀插旗，仲
要以呢個靚價收市添，全日就升咗超過２巴仙，市值更突破兩萬三億喇，達到２﹒３０１萬億左
右，霸氣盡現！
　　ＩＧＧ（００７９９）升極都仲未完，缸友都未有高處不勝寒嘅感覺，加上有祖國缸友南下
幫手，ＩＧＧ表現如有神助，今日去到歷史新高１１﹒７８銀插旗兼收埋市，全日就升咗近１１
巴仙。祖國神ＡＰＰ美圖（０１３５７）雖然爆升神話不再，但係北水充足，廣受祖國缸友愛戴
嘅美圖自然升埋一份，最多都升近４巴仙，全日埋單計就升咗超過２巴仙，報１０﹒８銀。
　　噚日歐洲股全線跑出，大笨象（００００５）喺佢母家米字國嗰邊都升咗超過２巴仙兼連升
三日，香缸呢邊都唔輸蝕連升咗四日，仲破埋幾條平均線，今日就進帳超過１巴仙收６３﹒８銀
。睇嚟缸友對行政總裁歐智華噚日喺非正式股東大會上，話集團受惠加息周期嘅言論，投下信心
一票喎。

＊內銀追落後郵儲上山頂，財仔奮力跑大摩都話正＊

　　今日魚缸表現咁好，神州錢莊佬都出咗唔少力；皆因中銀監出嚟話，首季不良貸款率跌咗少
少，郵儲行（０１６５８）係今日唯一一隻破頂嘅錢莊佬，最新山頂位去到５﹒１８銀，全日埋
單計就升咗近２巴仙，報５﹒１２銀。四大天王入面嘅農行（０１２８８）就跑贏晒所有街坊，
升咗超過２巴仙，報３﹒６２銀。
　　神州保險佬同樣相當強勁，而大摩就睇好財險（０２３２８），話佢今年嘅首季成績表會相
當好睇，更預測股價會喺３０日內上升。缸友對大摩講法毫無質疑，財險最多升超過３巴仙，埋
單計則升咗２﹒７巴仙，報１２﹒１６銀，跑贏所有街坊。緊隨其後嘅係壽仔（０２６２８）同
新華保險（０１３３６），分別升咗近２巴仙同超過２巴仙，報２３﹒４５銀及３８﹒６５銀。

＊豐盛被狙擊中途突停牌，華融５１９無奈要陪跌＊

　　豐盛（００６０７）慘遭沽空機構格勞克斯（Ｇｌａｕｃｕｓ）狙擊，話佢涉嫌操縱股價，
秘密轉移大部分有價值嘅資產畀主席。豐盛應聲下插近１２巴仙，報２﹒５２銀，之後急急高掛
免戰牌，格勞克斯估佢會大跌七至八成嘅「算盤」暫時打唔響。
　　一班同豐盛有密切關係嘅魚仔都好慘情，高速傳動（００６５８）由豐盛持有近７４巴仙股
權，跟住趴低４巴仙，報７﹒３９銀。豐盛持有２６﹒８巴仙權益嘅實力建業（００５１９）就
算發咗不明跌因，一樣要碌低逾１２巴仙，收０﹒５８銀。豐盛股東中國華融（０２７９９）都
無法倖免，跣低逾９巴仙，得返３﹒０４銀。

＊恆大玩回購粉絲都話好，媽媽忽減持ＡＳＭ回吐＊

　　恆大（０３３３３）噚日豪斥３﹒２４億銀回購３７００萬股，佢今日跳高逾５巴仙，報
９﹒２５銀，仲曾經創上市新高９﹒３２銀，勁！
　　超人家族嘅長建（０１０３８）噚日彈高逾４巴仙，今日再接再厲斬穫逾２巴仙，收
６７﹒６銀。大和估計佢今年會有更加多收購，將「他屐」上調至７２﹒３銀。
　　ＡＳＭ（００５２２）畀阿媽掟貨，折讓８﹒５巴仙配售４﹒９巴仙股權，套現大拿拿２１
億銀。雖然花旗話對消息唔意外，繼續叫「買」，但ＡＳＭ依然瞓低逾３巴仙，報１１１銀。
　　中彩網通（０８０７１）噚日復出缸湖，控股權易手畀杭州恩牛並提出現金要約。佢今日表
現強橫，火箭式飆上近８５巴仙，埋單０﹒２７５銀，足足比要約價０﹒０８２銀高２﹒４倍。
請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。