即市新聞

18/07/2018 17:36

《小傳日記》小米北水夢有轉機,魚缸悶市繼續低飛!

  《小傳日記》華爾街魚缸噚日(17日)本身就走勢平平,好在有聯儲局主席鮑威爾嘅講話
,為花旗國嘅經濟打咗支強心針,刺激道指收高55點至25119點,連升第四日。香江魚缸
今朝(18日)就跟住外圍一齊衝前,高開170點。喺QQ(00700)造好,同埋小米
(01810)顯著反彈之下,早段曾經升204點高見28386,可惜已經係全日最高位喇
。之後,大隻佬升幅愈縮愈少,「三桶油」又繼續受壓,離岸人仔跌穿6﹒74銀創近一年低,
中資金融佬嚇到腳仔軟,拖累魚缸最多倒跌136點,低見28045點逼近兩萬八關口。最終
全日碌低64點,報28117點。
  缸友們今日都繼續專注炒股炒板塊而唔炒市,主板成交都一樣咁少,全日只係得逾762億
銀。望住魚缸近排個氣氛,真係唔怪得之有幾隻準備新上場嘅魚毛,公開發售都認講不足喇,慘
慘。
  國指就好少少,只係跣底13點,報10578點。

*人生有希望小米唔徬徨,或納港股通好醫生輕鬆*

  小米先前因為暫不獲納入港股通而腳軟,好彩生發發與滬深交易所之後已經有咗共識,小米
都仍然有獲納入嘅希望,刺激佢今日跳起逾3巴仙,報21﹒55銀,仲見過22﹒2銀破頂添
,勁啊!
  恆指季檢將會喺下個月10號公布,券商華泰金融就做咗個預測,話平安好醫生
(01833)同埋碧桂園服務(06098)都有望納入港股通喎,佢哋就當然happy到
震喇。平安好醫生就一下子衝前逾7巴仙,埋單報49﹒8銀,仲「唔小心」突破埋廿天線
(48﹒352銀),氣氛真係好強勁。碧桂園服務都唔弱,跳起逾4巴仙,報13﹒66銀,
仲曾經高見14銀破頂添!

*QQ收晒水十天線夢碎,舜宇想反擊可惜唔夠力*

  QQ今朝一開波就衝前,最高見過383銀,距離條十天線(383﹒06銀)真係只差一
點點,但未能夠延續強勢,好快就縮晒水,埋單只係踢高唔夠1巴仙,報378銀。
  舜宇(02382)噚日就畀沽空機構GMT狙擊,嚇到佢上日碌低咗大拿拿7巴仙。呢位
手機佬梗係唔會唔出聲喇,當晚就馬上出公告澄清,話指控不屬實!今朝一開波,即刻反彈咗半
成,可惜唔夠力撐到最後,最終只係升近1巴仙收143﹒1銀。街坊瑞聲(02018)都唔
好得去邊,遭野村同大和唱淡,埋單要跌逾4巴仙,報103﹒3銀,係是日包尾嘅藍戰士。
  有內媒話中興(00763)解禁之後,就得到中移動(00941)嘅大額訂單,刺激中
興今朝最多曾經跳起近4巴仙,不過畀華泰證券出報告話,短期內仍需要關注市場風險,同埋公
司嘅改善狀況及業務恢復情況,缸友聽到都掟貨走人,最終要碌低逾6巴仙收15﹒46銀。中
移動軟半個巴仙收67﹒95銀。

*大摩勁睇好潤電升得高,長汽發盈喜廣汽跟住飛*

  今日大摩睇好華潤電力(00836),升佢「他屐」近14巴仙,由15﹒49銀去到
17﹒62蚊,評級由「持有」調高至「增持」。咁錫住潤電,難怪埋單彈高逾3巴仙,報
14﹒84銀走人。再加上阿爺要求推進電力等央行重組,一班鄰居即刻開Party慶祝,華
能國際(00902)飛起超過1巴仙,報5﹒67銀;華電國際(01071)直頭跳起近4
巴仙收3﹒53銀。
  砵砵車又再出動,長汽(02333)噚日收工後有好消息公布。佢話預期今年中期業績純
利會增長超過52巴仙。大摩同瑞信則分別維持目標價12銀受8﹒2銀,刺激長汽收5﹒49
銀,升近5巴仙,係最佳國指成分股,終於升破返10天線(5﹒382銀)!街坊廣汽
(02238)都跟住佢升,揚近1巴仙,報7﹒39銀。大家都係賣車,可惜吉利
(00175)就碌低近半個巴仙收報20銀。
  
*中燃氣跌低新奧卻發威,恆芯就閃人跌到好頭痕*

  有人歡喜有人愁,果邊人哋升得咁開心,呢邊燃氣佬就受壓,無陰公。中國燃氣
(00384)瞓低近3巴仙,報34﹒1銀。華潤燃氣(01193)本來都跌逾2巴仙,但
尾市差唔多收復番失地,最後只係輕輕跣低收35﹒55銀;另一邊廂,新奧能源
(02688)就跑贏晒所有街坊,逆市衝高近2巴仙收84﹒7銀,仲喺85﹒2銀山頂位插
遺添。而香江呢邊嘅煤氣(00003)都成為資金避難所,一樣逆市破頂見15﹒76銀,收
升近2巴仙報15﹒74銀。
  小魚毛果邊,恆芯中國(08046)因為業務少過極低營運水平,搞到自從2013以來
一直錄到蝕本,所以遭聯交所決定取消上市地位,嚇到就急挫近17巴仙收得1仙。請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力