《小傳日記》多得呢幾日科技佬放榜期，炒多兩炒叫勉強拉返魚缸總成交上８００億以上，
不過多得嗰少少都無咩作為，起碼都要上返千億銀一日先叫無咁頹，而家都仲有大段距離！
近期名創優品（０９８９６）都搞到神州網民好唔高興，起因就係佢哋喺西班牙嗰邊嘅ＩＧ
上面，宣傳新出嘅旗袍裝迪士尼公主公仔，居然用西班牙文話旗袍裝係「藝妓裝」，於是一批西
班牙網民都ｃｏｍｍｅｎｔ糾正話套衫係中國旗袍，唔係日本和服，但係嗰邊管ＩＧ嘅只係「以
笑回應」，用微笑ｅｍｏｊｉ就算。咁嘅回應當然引起神州網民群起撻伐，於是愈撩愈多，更加
有人講起原來公司有規定，喺舖頭入面唔可以播中文歌，更加就刺激上面情緒。
其實名創優品一路以來都自稱係日本品牌，又提到自己嘅總設計師係日本人；當然大家第一
次見佢個ｌｏｇｏ同舖頭陳設，都會ｆｅｅｌ到嗰種濃厚嘅扮日本味道，連最初佢哋自稱嘅日本
總部地址，都被人發現其實都係假嘅。尤其近期神州嘅「和服爭議」，等到今時今日名創優品先
被國潮算帳，都算遲了。
名創優品就今次事件列舉咗「三大點」整改；一係繼續「去日化」，聲明提到２０１９年底
公司已經推動緊「去日化」，逐步換ｌｏｇｏ改舖名；二係嚴肅追究海外ＩＧ管理公司；三係將
海外社交媒體統一由總部管理。聲明更加強調公司係中國企業，之後要做「堂堂正正嘅中國品牌
」，要弘揚中國民化，將中國文化潮流元素融入產品等等咁話。
講返西班牙嗰邊又係一個謎，雖然外國人真係有可能分唔清旗袍同和服，但係已經有當地網
民更正佢哋，但係居然回ｅｍｏｊｉ而唔係即時更改，都唔知係無心定故意。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
