《小傳日記》港股日升日跌，前日嘅升幅噚日跌凸，搞到散戶無曬心機。點知噚日跌完今日
又升返，仲要升成３００幾點，相信散戶可以暫時鬆一口氣，鬆幾耐？真係無人知，話唔定聽日
又跌返呢（大吉利是！）遇著呢種上落市，短炒嘅話有賺都早啲走人，袋袋平安。如果唔係，隨
時賺變蝕，到時喊都無謂。
莫講話日升日跌，單日轉向由升轉跌嘅成日有。好似老鋪黃金（０６１８１）咁，剛剛發盈
喜，話中期淨利潤按年升１﹒８至２﹒０５倍。股價今早高開６％後，開市後即刻掉頭向下，倒
跌８％。高低波幅有一成半。市值七十幾億銀嘅股票尚且咁飄忽，更何況其他細價股？
如果你覺得波幅一成半叫做誇張嘅話，咁你就只真係未見過大蛇痾尿。之前講嘅大眾公用
（０１６３５）今日就示範呢啲高難度動作。今日股價先升近兩成（１９﹒７％），再轉跌
２３﹒６％。由最高價２﹒７９銀跌至最低１﹒７６銀，高低波幅５８﹒５％。股價好似過山車
咁，夠唔夠刺激？唔止今日，噚日高低波幅都不遑多讓，高達４０﹒２％。
大眾公用自上星期四（２５號）開始升，上周兩日升幅溫和，單日升幅都係幾個百分點。但
今個星期就開始飆升，星期一收升５７％，星期二最高升４２％，但收市升幅收窄。自２４號收
市價１﹒１８銀至３０號最高價２﹒８６銀，幾日累積升幅達１４２％，股價見４年高。在
２０２０年４月同樣出現過單日炒上５２％，再喺高位跌返３２％嘅劇情。
由於港股不設升跌停板機制，股價隨時被炒上一兩倍或炒落九成幾。無論係大價股定係細價
股，都要衡量好風險。如果唔係，隨時接咗火棒。其實，好多年前，已經有人話過，買港股隨時
刺激過去澳門賭，呢句話雖然有啲誇大，但對某啲暴升暴跌嘅股份嚟講，真係隨時刺激過去賭，
事關賭博你可能已經做好心理準備，但買股票遇到暴跌可能出乎意料，所以買股票真係要好好衡
量自己風險承擔能力。請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】當局擬放寬九龍東商業區土地用途，有議員認為應推廣至全港都開放些少，你是否認同？► 立即投票
