《小傳日記》小米兩日升超過一成，嚟緊手機業務要加把勁！

　　《小傳日記》今個星期有多間公司放榜，今日比較多人留意嘅，相信係噚日(22日)收市後放榜嘅小米(01810)喇。
　　小米舊年全年純利193.39億人仔，按年跌5%；經調整淨利潤按年就升69.5%到220.4億人仔，好過「孖屐」預期；收入3283.09億人仔，按年升33.5%；毛利582.61億人仔，按年都升58.5%，成份業績都唔係太差嘅。值得留意嘅係，噚日巴巴(09988)先公布完回購計劃，今日小米都宣布，嚟緊會以不定期按最高總額100億人仔，喺公開市場購回股份。
　　有成績表沖喜，加埋回購消息一出，股價今日高開近2%，中段曾經升超過6%。以近年一路尋底嘅小米嚟講，呢兩日夾埋升超過一成，可以話相當少見。
　　「孖屐」人士又點睇呢？有四間大行都減小米嘅目標價，主要都擔心手機出貨量嘅問題。小米舊年喺全球嘅智能手機出貨量按年增長30%至1.9億部，智能手機出貨量排全球第三，市佔率14.1%，年度出貨量同市場份額均創歷史新高。不過，大和覺得小米今年手機出貨量表現會麻麻哋，降低預測到2.05億部，又下調2022-23年盈利預測5%，甚至降低11%目標到16銀。麥格理就覺得，中印兩國之間激烈嘅競爭，加上其他國內手機品牌喺其他海外市場持續增長，可能會拖慢小米市佔率嘅增速，目標價都降低到12.8銀，幅度達24%！
　　講真，小米手機出晒名一個字:平！但係依家嘅用戶用手機唔剩止講求平，功能上嘅運用都幾緊要，加上越嚟越多對手冒起，小米喺國內都再度跑出都真係要加把勁。
　　另一個比較值得關注嘅地方，係小米唔止要做手機，仲要做埋車！公司話汽車業務研發團隊規模已經超過1000人，預計喺2024年上半年正式量產。小米手機業務已經開始有競爭，依家仲諗去做車，正所謂「萬事起頭難」，出產嘅車價錢上、性能上，甚至受歡迎嘅程度係點，都仲估估下。與其花咁多時間搞車，不如諗多啲方法搞好手機嘅功能先喇！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。