RSS訂閱 噚日（１日）中午領展（００８２３）就公布咗今年第一份成績表，雖然受到新冠疫情同埋香江社會活動嘅衝擊，佢依份成績表仲係符合「孖屐」預期，收益同物業收入淨額分別按年升６﹒８巴仙及６﹒９巴仙，至１０７﹒１８億銀及８２﹒２０億銀。至於缸友最關心嘅派息，末期每基金單位分派１４５﹒７２仙，連同中期分派，全年合共分派２８７﹒１９仙，按年照樣有得增加近６巴仙。而且公司仲話，無意因為市況轉差改變派息政策，博客覺得呢條魚毛揸得過。
喺今年嘅網上業績發布會上，行政總裁王國龍就話，因為希望每間商場嘅出租率保持高企，所以會喺租金上面做一定嘅調整，加上會審視續租租客嘅情況衡量方案，所以整體而言都會令領展的平均租金有下調幅度。不過佢又話，近日香江嘅「限聚令」有所放寬，而且商場嘅人流開始慢慢多返，街市生意亦唔錯，相信最壞時間已過去，零售收入已見底，並正在穩健上升。
大行大摩都喺績後上調咗領展嘅評級到「與大市同步」。大摩表示，預計公司喺神州將有更多嘅併購機會，而且之前公司宣布深圳項目嘅資產增值計劃並將於今年第三季開始，相信計劃可以進一步利好公司估值。
目前，公司嘅息率４﹒５巴仙左右，同其他香江本地地產平均值５﹒９嘅息率相比吸引力係較弱。但係從業務睇，領展主要都係做本地街坊生意多，租客以必需品及食肆為主，相信會畀其他地產會更快喺「疫市」中恢復。
從公仔圖睇，領展績後即從逾兩年嘅低位一個Ｖ型急彈，重上十天線（約６１﹒６３銀），博客就覺得佢近輪升得過急，不妨等佢企穩，喺６１銀附近撈貨，上望７５銀。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
