RSS訂閱 博客成日都話，股票板塊一向都係「輪住嚟炒」，同增永遠都係消息面先行，所以有Ｄ看似現實情況較差嘅股票，可以因為某Ｄ原因而突然炒起，所以大家都要留意多Ｄ消息面。今次博客想介紹嘅一隻股票就係銀河娛樂（０００２７）啦！
由於馬交嘅疫情基本上已控制咗一段時間，上月底馬交政府已經積極救當地旅遊業同賭業，將旅遊復甦計劃將分三個階段進行，包括向過夜旅客提供半天遊。相信有政策支持同食住經濟復甦「條水」，相信短期賭股係有機遇。
馬交５月份博彩收入僅錄得１７﹒６億銀馬交銀，雖然按年瀉九成三，呢樣就預左，但按月就回升１﹒３倍。相信受惠低基數效應同經濟恢復，博彩收入按月好大機會繼續上升，短期利好班賭佬。
另外，銀娛好快會繼續有新項目落成提升競爭力，在路氹城嘅銀河第三期料於２０２１年上半年開幕，項目包括１５００間客房的新酒店。再者，近年家庭旅遊增長，加上旅客年輕化，佢嘅娛樂地標「澳門百老匯」有「百老匯美食街」、「百老匯舞台」同「百老匯酒店」，相信項目多元化可以受惠呢個趨勢。
疫情持續時間未確定之下，具較高流動性或者具較強嘅生存能力嘅濠賭股更值得買入，截至去年底，銀河娛樂所持現金與每日營運費用嘅比例，係行業排前列，所持現金更達６２﹒４８億銀，比金沙（０１９２８）的２４﹒７１億銀仲要多！
公仔圖方面，佢近期走勢唔錯，做緊個上升「旗型三角」，若衝破近期５５﹒８５銀嘅前頂，相信短期可上望６０銀！建議現價買入，穿５０銀走佬！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
