RSS訂閱 盈盈時常覺得特斯拉（Ｔｅｓｌａ）Ｄ車嘅款式，充滿時代感得來又有型，難怪積累咗一班粉絲，而花旗國嗰邊特斯拉股價今個月亦升咗大約一成！而特斯拉除咗電動車之外，仲研發無人駕駛。電動車特斯拉就耍家啦，唔知無人駕駛方面，佢喺行內又係咪權威呢？
探子回報，近日有間諮詢公司Ｎａｖｉｇａｎｔ，出咗一份１９間無人駕駛汽車企業嘅排名，個排名係以戰略同執行度，整體公司嘅市場化策略、技術、市場份額各方面去為呢Ｄ企業評分。而令人覺得出奇嘅係，綜合排名當中排首位嘅係通用汽車，而特斯拉竟然榜上無名！
雖然特斯拉嘅老細「鋼鐵人」馬斯克（Ｅｌｏｎ Ｍｕｓｋ）好出名，但公司發展無人駕駛車路途上都遇到好多波折。早前嘅安全事故，更加大大拖累咗特斯拉發展嘅進程。相反，通用汽車就收購咗一間無人駕駛汽車Ｃｒｕｉｓｅ，呢間公司輕鬆獲得通用嘅汽車設計同底層架構，兩間公司工程師一直緊密合作，而上星期通用已經向政府申請出年生產自動駕駛車，進展比特斯拉順利得多。
其他公司方面亦都密密練兵，就連福特、寶馬、福士都加入戰團，之前豐田都話要同
ＰｉｚｚａＨｕｔ合作推出自動車送外賣計劃，而特斯拉未來究竟會點樣突出重圍呢？真係好考「鋼鐵人」嘅能力啦！ 《任盈盈》
－－－－－－－－－－－－－－－－－－－－－－－－－－－－－－－－－－
Ｎａｖｉｇａｎｔ自動駕駛汽車公司綜合排名榜
－－－－－－－－－－－－－－－－－－－－－－－－－－－－－－－－－－
排名 公司
－－－－－－－－－－－－－－－－－－－－－－－－－－－－－－－－－－
１ 通用汽車
２ Ｗａｙｍｏ
３ 戴姆勒－博世（Ｄａｉｍｌｅｒ－Ｂｏｓｃｈ）
４ 福特（Ｆｏｒｄ）
５ 福士（Ｖｏｌｋｓｗａｇｅｎ）
６ 寶馬－英特爾－飛雅特克萊斯勒（ＢＭＷ－Ｉｎｔｅｌ－ＦＣＡ）
７ 安波福（Ａｐｔｉｖ）
８ 雷諾日產聯盟（Ｒｅｎａｕｌｔ－Ｎｉｓｓａｎ Ａｌｌｉａｎｃｅ）
９ 富豪－美安－愛立信－Ｚｅｎｕｉｔｙ
（Ｖｏｌｖｏ－Ａｕｔｏｌｉｖ－Ｅｒｉｃｓｓｏｎ－Ｚｅｎｕｉｔｙ）
１０ 標緻雪鐵龍（ＰＳＡ）
－－－－－－－－－－－－－－－－－－－－－－－－－－－－－－－－－－－
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
