RSS訂閱 由去年講到今年嘅復星旅文（０１９９２）終於上市，如果缸友有印象，博客都曾經提過下郭董（郭廣昌）嘅「航空母艦」，目前復星系本港主要上市公司，包括復星國際（００６５６），復銳醫藥科技（０１９６９）以及復星醫藥（０２１９６）。
雖然上海復地係２０１１點私有化咗，當年提出私有化價格係每股３﹒５銀。到今時今日上海樓價係幾咁貴，郭董呢招「肥水不流股民田」真係一絕，所以炒復星，並唔係再炒公司前景，而係炒郭董嘅個人魅力。須知道郭董係呢個弱市先分拆旅文業務上市，真係完全睇唔透，正正就係因為散戶睇唔透，先可以有投機嘅機會。
呢次文旅公開發售成績真係麻麻地，公開發售認購不足，得０﹒３倍認購量，其他無人認購嘅就撥到國際配售。但玩開新股嘅缸友，就明白到呢一點其實意味住「貨源歸邊」，目前郭董揸住文旅八成股份，公開發售兩成入面，得６巴仙街貨，餘下１４巴仙係國際配售，要有鑊氣炒高無難度。
意味住乜嘢？就係旅文一上市，復星國際市値就被擴大，至於擴大幾多就視乎文旅鑊氣有幾強。呢兩日復星國際似乎有春江鴨好似入手，如果缸友想搭呢趟順風車，目前都重未開車，依然有上車機會。
大家會問，咁點解唔直接買旅文呢？因為新股嘅風險波動始終較高，而且由於旅文目前貨源歸邊，大戶如果大手出貨的話，雖未至於話令散戶損手（因為佢都幾大隻），但輸手續費都無謂；相反買復星國際就穩陣小小。
復星現價大概１２﹒７銀，現價入都貼近５２周低位，都買得過，相信如果旅文聽日爆炒，要破１３銀應該無難度，短期阻力位會係１０月２日左右嘅高位１４﹒２２銀，突破到可以繼續坐，如果調頭回落就可以先行止賺；如果復星調頭回落，相信下跌空間不大，因為１０月３０日已經見過１年低位，如果穿呢個位就止蝕未遲。簡單一句，目前嘅復星可算係「進可攻，退可守」啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
