RSS訂閱 連升咗兩日嘅魚缸，今日（２２日）終於出現回調，不過好彩就算跌都仍然企穩喺２５０天線（約２８２９６點）嘅位置，博客睇埋技術指標，現時１０天線（約２８３３４點）已經同２５０天線形成「黃金交叉」，而恒指１４天ＲＳＩ只係６６左右不算高，暫時睇，大家可能都等埋今日中美貿易談嘅結果，先知未來走勢如何。
講返個股，博客最近睇到幾隻魚毛，都因為業務造好而炒上，近嘅有聯想集團（００９９２），遠嘅就有金界（０３９１８），所以今次都想同大家推介一隻今日公布半年業績嘅魚毛，就係新地（０００１６）旗下嘅新意網（０１６８６）啊。
或者缸友唔太知新意網係做咩，其實缸友可以想像佢係一隻「收租股」，因為佢嘅主要業務就係將數據中心出租，提供電力同維護畀客戶伺服器，從而收取租金，「孖屐」炒５Ｇ缸友都知，所以隨住５Ｇ時代嘅來臨，對數據中心嘅需求應該會增加。另外經濟前景未明朗下，有一定固定現金收入嘅魚毛都會有一定防守性，一般而言，數據中心嘅租約都由一至五年不等。
睇埋成績啊，上年九月嘅全年業績亦十分亮麗，全年盈利上升逾２３巴仙至７﹒７６億銀，期內，收益１３﹒６５億銀增加近２０巴仙，毛利７﹒９９億銀升逾１３巴仙。新意網亦有拓展業務嘅活動，早前以５４﹒６億投得喺將軍澳環保大道地皮，用作為高端數據中心用途。
現時日本ＮＴＴ ｃｏｍｍｕｎｉｃａｔｉｏｎｓ係香港最大嘅數據中心營運商，但有分析就話自投得將軍澳地皮後，預計市佔率會超過２４﹒２巴仙，取代ＮＴＴ嘅地位，不過高價投地對新意網嘅負債壓力唔細，暫時未知新意網會唔會用供股，或者減派息等形式集資，不過阿媽新地前幾日就發行咗５億美元十年期債券，唔知當中有無啟示呢？
睇返公仔圖，今日股價穿咗十天線（約５﹒６８２銀），而睇遠啲佢由上年九月開始呈現圓底，不過近日開始升勢發緩，或者係缸友想睇埋業績再部署，所以如果缸友對佢今日份業績有信心，不妨以現價買入，如果可以突破上年９月６日嘅陰燭頂（５﹒８４９銀），再上望６銀嘅位置似乎可以期望，但如果之後穿５銀嘅位置，缸友就要識走人喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
