當大家有錢存入銀行,但突然間ATM拎唔到錢,仲以為自己存款歸零,真係驚到個心離一離,盈盈好耐之前都試過!但噚日(17日)可能全寶島人都咁好驚青,因為全台灣ATM都壞咗!
事緣尋晚有消息傳出,就話好多寶島民眾喺ATM拎唔到錢,不過經過財金公司巡查之後,確認係IBM嘅人員喺系統維修過程入面好大頭蝦,唔小心郁到相關線路,搞到線路鬆脫,令交易資訊傳送失敗。個系統係下晝5點9起陸續發生網結異常狀況,搶修之後,係6點4已經正常返。
寶島監管當局就話,根據銀行同財金公司所講,跨行交易系統係噚晚6點出現堵塞,但發覺唔對路嘅情況喺6點4排除咗,初初以為係大量交易當機,最後發覺係人為疏忽。
盈盈聽落都覺得有D誇張,就算人為疏失誤觸線路,點會造成咁大規模ATM出現問題?雖然只停20分鐘左右,都係令人R哂頭。
講開又講,寶島財金公司都唔係第一次畀IBM搞到中伏啦!原來舊年8月,財金公司因「IBM大型主機IMS系統異常」,搞到跨行交易跪低兩粒鐘,最後仲因為比人話「未能妥適監督系統服務商IBM」,比當局罰款。
計盈盈話,錢銀呢D嘢真係要留神呀!好似早排香江交易所咁,突然期指當機,搞到投資者震騰騰,何況今次影響嘅普羅大眾市民。汲取寶島呢次教訓,大家以後都要醒定D,記得放住D茄殊旁身啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情