RSS訂閱 盈盈發現，而家啲有錢佬唔興爭身家排名，反而鍾意鬥捐錢捐得多。噚日先講巴菲特捐咗２９億美金巴郡Ｂ股，今日Ｔｗｉｔｔｅｒ ＣＥＯ傑克‧多西（Ｊａｃｋ Ｄｏｒｓｅｙ）就話自己淨資產已經有７５億美金，所以拎啲出嚟做善事，計劃用３００萬美金，即係２３２５﹒１５萬港紙左右，喺花旗國試下做基本收入保障，預期有７００萬人可以受惠。
呢個試點計劃希望涵蓋１４個國內唔同城市，市長亦都計劃遊說聯邦律師將佢定為全國計劃。而家仲未知邊啲人有資格拎錢，亦唔知佢哋每個月會拎到幾多，負責人話，保證收入可以令低收入人士擺脫貧困，並緩解新型肺炎危機對經濟和職業的負面影響。
有人批評，呢個計劃變相係鼓勵人唔做嘢，令花旗國嘅金融危機更加嚴重。但都有人支持，話保證收入可以拉近最有錢果批同最窮果批人之間嘅貧富差距，特別喺疫情期間，呢一個Ｇａｐ變得愈來愈大呀。
咁又真呀，過往有好多研究表明，每逢出口經濟危機，政府投放嘅津貼好多去晒大企業到，窮人只係分到好少資源；當危機過咗，因為孖屐熱錢太多，推高通漲，結果受苦嘅又係窮人。依家呢個ｐｒｏｊｅｃｔ可以話係「唔完美但可接受」，「唔完美」在於批評者所擔心嘅嘢真係有可能會發生，「可接受」在於反正佢哋遲早都需要幫，而家面對咁大個難關，幫咗先都無壞。
另一方面，其實有錢佬都唔好得幾多，歐洲最大諮詢公司凱捷發布咗《２０２０全球財富報告》，話上年以美金計嘅全球百萬富翁總資產有成７４萬億美元，但截至今年４月底，疫情已經令佢哋身家縮水６巴仙至８巴仙。所以，而家可以話係無咁痛苦嘅人，幫緊一啲更加痛苦嘅人，大家圍爐，取下暖，希望真係挨得過今次疫情啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
