RSS訂閱 炒比特幣好耐之前已經發生緊，但係球星宣傳比特幣就好少聽。NBA金州勇士隊嘅明星後衛Klay Thompson同前鋒Andre Iguodala 今個月11號先後喺Twitter上面宣布接受一部分糧以比特幣方式支付，並且表示自己係比特幣的虔誠信徒，相信「比特幣就是未來的貨幣」！不過原來佢哋喺twitter發文係同一個美國移動支付公司Square 旗下嘅cash app合作，並且強調份糧係通過cash app用比特幣俾錢。為了增加宣傳效果兩個人仲向粉絲送價值一百萬嘅美金，搞到連盈盈都想抽埋一份！
粉絲留意返近排比特幣嘅波幅好誇張，根據交易平台CoinDesk最新報價，比特幣係43687美金，相比起年初嘅48000美金左右水平，累計回落約9%，相比起舊年11月接近69000美金嘅歷史高位大跌咗36%。Crypto市場仲有好多壞消息，譬如中國大陸就嚴禁「掘礦」。薩爾瓦多上年將Bitcoin列做法定貨幣之後，當地政府由上年9月開始一共8次大手買入，到依家合共投資咗7千萬美元落比特幣身上，但係依家蝕咗超過千萬美金。
相信咁多位都唔會揀比特幣做出糧嘅方式，因為好似上面話齋，風險太大！買賣比特幣亦都好靠運氣，盈盈勸咁多位籃球球星嘅粉絲，唔好畀明星效應影響到，要衡量過風險先去投資！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
