RSS訂閱 俄羅斯自從入侵烏克蘭以嚟，唔少外國企業同品牌都因為制裁俄羅斯而紛紛撤走，當中包括唔少喺俄羅斯建立咗名聲同客源嘅大公司。咁俄羅斯就有唔少企業推出山寨版外國貨，想話填補市場空缺，點知啲消費者覺得呢啲山寨產品無法同正版相比，唔知呢啲公司又有咩反應呢？
自從可口可樂3月撤出俄羅斯業務之後，俄羅斯商店嘅貨架幾乎再見唔到相關飲品喇，就算當地有存貨都加價2倍以上。咁俄羅斯飲品生產商Ochakovo咪推出CoolCola、Fancy同埋Street嚟代替可口可樂(Coca-Cola)、芬達(Fanta)同雪碧(Sprite)，畀消費者解癮囉。呢啲飲品無論由個名同包裝都同原裝相似，Ochakovo甚至仲話連啲味道都似喎。之但係市場對Ochakovo同其他俄企推出嘅山寨版可樂褒貶不一。有啲消費者抱怨同正版相比，山寨版唔夠甜又唔夠氣。
其實外國企業撤出俄羅斯，令唔少國際品牌嘅商標被俄羅斯公司二次創作，仲向俄羅斯智慧財產局申請商標註冊。喺俄羅斯官方的知識產權註冊服務台度，已經出現山寨版麥當勞、IKEA、Nespresso嘅商標註冊。此外，俄羅斯封殺Meta旗下Instagram、Facebook等社交軟件後，俄羅斯亦開始出現RuTube、Fiesta、Rossgram等山寨版社交平台。
盈盈就覺得，一個品牌要受到消費者歡迎，首先就係要有良好嘅質量，仲要一路keep住做得好，得到消費者信任，咁樣個品牌先至長做長有，無人能代替佢嘅地位。一步登天就係無可能嘅。睇嚟如果有公司有意填補市場空缺，首先就要做吓research，睇吓究竟啲消費者對原本存在嘅品牌同產品質量有咩優點，然後先至進行研發，再推出市場，仲要接受消費者嘅評語不斷去調校，穩紮穩打，咁樣就自然「錢」途無限喇。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
