RSS訂閱 盈盈噚日講完河南「小麥換樓」同「大蒜換樓」嘅消息，今日就有傳媒報道話，類似「換樓」活動目前已經被提前叫停。有賣樓工作人員澄清，「大蒜換樓」係按當地特色農產品推出嘅購房補貼政策，實際上唔收蒜亦唔要蒜，即係買樓嘅人無論有無大蒜，都可以參與所謂「大蒜換樓」，享受開發商畀嘅買樓補貼。
事件亦受到官媒《證券時報》關注，喺評論文章為呢啲賣樓奇招「解畫」，話反映地方去庫存嘅迫切，有啲政策「情急下難免走樣」。不過，文章提到另一個「惡意不買樓」傳言，盈盈覺得有啲不可思議！
話說山東省青島薛家島街道辦事處早前發布「關於做好促進居民購買新建商品房的通知」，要求落實「上級部署」，發動轄區居民買新建商品房。通知又指，官員會約談「惡意不買樓」嘅居民，即係若然查到民眾銀行帳戶存款充裕但不買樓，會被提醒談話。另有傳言指如果最尾「肥佬」，社區書記可能會被扣錢。
《證券時報》話，如果呢啲唔係網絡傳言，就「不免令人憂心忡忡」，並指各地施策去庫存嘅過程創立新制度、保護弱勢群體嘅做法值得肯定，並警告「要防止矯枉過正，打通不適應市場嘅過時政策」。
盈盈覺得用農產品換樓已經夠晒特別，但估唔到為咗要交數，有錢但唔買樓嘅人居然會畀人約談，唔通「有錢就是原罪」？所謂「物極必反」，有時啲人去得太盡，唔合符常理，就愈無可能達到目標，依家仲要畀官媒「問候」，希望嗰班官員識做嘢啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
