《笑傲缸湖》花旗國魚缸大插水，邊個富豪身家跌最多？

　　《笑傲缸湖》花旗國魚缸隔晚一片「紅海」，道指插水超過８００點，係八個月以來最大單
日跌幅，同時亦係標普同道指，喺今年２月８日以來最大單日跌幅，其中幾隻科技股巨頭都成為
重災區，亞馬遜暴跌超過６巴仙，Ｆａｃｅｂｏｏｋ同蘋果亦下跌超４％，微軟同巴郡都跌５巴
仙。　
　　單計噚日嘅跌市，全球５００大富豪身家蒸發咗９９０億美金，花旗國一眾富豪齊齊唔見
５４５億美金，遠超其他國家。不過，喺一片「紅海」入邊，邊個又跌得最甘呢？登登登凳，就
係今年第一次一嘗成為全球首富滋味嘅亞馬遜創辦人貝索斯，喺噚日跌市令佢身家縮水９１億美
金，係今年七月以來嘅低位，唔見錢仲多過傳統富豪標叔叔（蓋茨）同股神巴菲特加埋嘅６７億
美金，但係如果以百分比計，股神就係呢次大跌市入邊嘅大輸家，唔見咗近５巴仙，同ＬＶＭＨ
創辦人阿爾諾齊齊唔見４５億美金。
　　不過，大家真係唔使為佢地擔心，事關就算根據彭博十大富豪榜入面，除咗奧蒂嘉
（Ｚａｒａ創辦人）、朱克伯格（ｆｂ總裁）同斯利姆（墨西哥電信總裁）喺呢一年內身家縮水
之外，其他幾位仍然比前一年有增幅，增幅最多嘅，仍然係位列榜首嘅貝索斯，比前一年增幅達
４６２億美金，大大拋離第二位標叔叔成４１７億美金，認真厲害啊！
　　今日（１１日）香江魚缸都跟住花旗國大跌，低開８００幾點其後試過跌逾千點，藍戰士齊
齊轉紅，盈盈都覺得唔開心，希望各位缸友無事，大步檻過喇。《任盈盈》

　表列最新彭博全球億萬富翁榜頭十名：

名字　　　　　　　　　　　　　　　　　　　身家淨值　　　單日變動　　備註
　　　　　　　　　　　　　　　　　　　　　（美金）　　　　（美金）
－－－－－－－－－－－－－－－－－－－－－－－－－－－－－－－－－－－－－－－－－－
貝索斯（Ｊｅｆｆ　Ｂｅｚｏｓ）　　　　　１４５２億　　－９１﹒０億　亞馬遜創辦人　
蓋茨　（Ｂｉｌｌ　Ｇａｔｅｓ）　　　　　　９６３億　　－２２﹒０億　微軟公司創辦人
巴菲特（Ｗａｒｒｅｎ　Ｂｕｆｆｅｔｔ）　　８７５億　　－４５﹒０億　巴郡創辦人
阿爾諾（Ｂｅｒｎａｒｄ　Ａｒｎａｕｌｔ）　６６９億　　－４５﹒０億　ＬＶＭＨ創辦人
奧蒂嘉（Ａｍａｎｃｉｏ　Ｏｒｔｅｇａ）　　６４４億　　－　４﹒４億　Ｚａｒａ創辦人
朱克伯格（Ｍａｒｋ　Ｚｕｃｋｅｒｂｅｒｇ）６０１億　　－２５﹒０億　臉書創辦人　
斯利姆（Ｃａｒｌｏｓ　Ｓｌｉｍ）　　　　　５７８億　　－　７﹒３億　墨西哥電信總裁
佩奇（Ｌａｒｒｙ　Ｐａｇｅ）　　　　　　　５３５億　　－２３﹒０億　谷歌聯合創辦人
布林（Ｓｅｒｇｅｙ　Ｂｒｉｎ）　　　　　　５２１億　　－２２﹒０億　谷歌聯合創辦人
埃里森（Ｌａｒｒｙ　Ｅｌｌｉｓｏｎ）　　　５１５億　　－１３﹒０億　甲骨文創辦人
－－－－－－－－－－－－－－－－－－－－－－－－－－－－－－－－－－－－－－－－－－

　　《編者按》本欄搜羅即市傳聞，惟消息未經證實，《經濟通》亦不保證內容之準確性。