《笑傲缸湖》位列2020年十大高薪對沖基金經理之一嘅阿克曼(Bill Ackma
n),舊年淨係人工都賺咗14億美金,一年之前佢就靠做空美股發大財,喺疫情爆發之前做空
,用2700萬美金布局對沖工具,之後美股股災佢就大賺26億美金,仲未計之後股市反彈嘅
回報,真心發咗個「國難財」。不過佢賺幾多都唔關盈盈事,重點係佢又開始做空,估美股會因
為利率攀升又free fall!
Ackman話而家花旗孖屐面對嘅最大風險係利率走高,所以佢買咗啲相關嘅投資工具,
仲預計最早今年年中就會見到通貨膨脹率抽升,其實而家已經慢慢走上,華府又就嚟放水1﹒9
萬億美金,消費需求會勁大,到時利率變動夠得人驚,就會引爆大市!
盈盈一開始心諗,如果佢睇唔準個Trend,結果年中嚟個大牛市佢咪蝕到嘔,唔驚嫁咩
?但係原來Ackman一早計掂數,買對沖工具筆錢就當買保險,如果佢估得啱就賺到笑,就
算估錯都係蝕少少,旗下基金繼續長搵長有。講真班基金經理真係進可攻退可守,所以前排散戶
齊心鬥大鱷嘅新聞係就係好熱血,不過人哋有錢有腦有人脈,點會夠人玩。《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
全新節目《說說心理話》青少年不可以戀愛!?真實個案講述驚心動魄經歷► 即睇