RSS訂閱 《笑傲缸湖》鄭州暴雨成災，連續落足幾日大暴雨，剩係「最近累計３天降雨量」已經差唔
多等如鄭州平均全年降雨量。周圍都嚴重水浸，唔少當地居民都有家歸不得，唯有寄住喺酒店甚
至係公司先，搞到好多酒店都ｂｏｏｋ爆曬。估唔到呢個時候竟然有酒店坐地起價，要收成３０
００蚊一晚，都好唔人道吓喎。
水浸處處，喺鄭州一間高鐵站附近的連鎖希岸酒店，竟然以為水浸可以浸到入自已荷包，災
難當前居然將一晚住宿費，由２、３００人民幣加到３０００人民幣，唔少災民迫住捱貴租都要
住住先。後尾有人發現就將呢個癲價惡行放上網，即刻引嚟大班內地網民群插！
飯店總公司為咗拆彈，後來就發布道歉聲明割蓆，話係出事嘅加盟店私自違規加價，之後會
積極配合相關部門監督檢查。為表歉意，鄭州旗下所有連鎖門店都會免費提供救援人員嘅住宿，
同時鄭州東站高鐵站店會開放所有客房，免費為受災嘅民眾提供酒店房。
不過唔少網民都唔受落，問加盟店個老闆係咪水浸浸到個腦入水，又話佢哋發國難財，應該
要執咗佢。仲有人講到「市場行為在這個時候是不受保護的，別忘了你是在社會主義的中國啊」
、「資本的醜惡嘴臉」。
盈盈就覺得災難當前，仲要係「千年一遇」嘅大水災，就唔應該發國難財啦。盈盈喺度都希
望災情快啲退去，災民都可以快啲返到屋企。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
